Дар ҷаласаи имрӯзаи Шӯрои палатаи поёнии парлумон таҳти раёсати раиси Маҷлиси намояндагони Маҷлиси Олии ҶТ Шукурҷон Зуҳуров лоиҳаҳои тағйироту иловаҳо ба Кодекси ҷиноятӣ, Кодекси мурофиавии ҷиноятӣ ва Кодекс дар бораи ҳуқуқвайронкунии маъмурӣ мавриди баррасӣ қарор мегиранд.
Дар тағйироти зикршуда сангинтар шудани ҷавобгарии шахсони воқеъиву ҳуқуқӣ барои даст доштан дар муомилоти ғайриқонунии асъори хориҷӣ, аз ҷумла зиёд шудани ҷаримаву муҳлати таъқиб ва мусодираи асъори дар гардиши ғайриқонунӣ қарордошта пешбинӣ шудааст.
Тавре котиби матбуотии палатаи поёнии парлумон Муҳаммадато Султонов ба «Азия-Плюс» иттилоъ дод, дар ҷаласаи Шӯро ҳамчунин тағйироту иловаҳо ба қонунҳо «Дар бораи тартиб ва шароити дар ҳабс нигаҳдории гумонбаршудагон, айбдоршавандагон ва судшавандагон» ва «Дар бораи шартномаҳои байнулмилалии Ҷумҳурии Тоҷикистон» низ баррасӣ мешаванд.
