Як гурӯҳи занони тоҷики либоси азодорӣ пӯшида ва ҷавонон рӯзи 19 май назди дафтари намояндагии Иттиҳоди Аврупо (ИА) дар Душанбе гирдиҳам омада, аз дипломатҳои аврупоӣ тақозо кардаанд, ки «хиёнаткорони ватан» ба ихтиёри Тоҷикистон дода шаванд.
Бино ба иттилои
Радиои Озодӣ
, эътирозгарон дар даст акси чанде аз қурбониёни ҳамлаҳои хунини моҳи сентбяри 2015 дар Душанбеву Ваҳдатро доштанд. Онҳо гуфтанд, ки дар ин ҳамлаҳо наздикони пулисашонро аз даст додаанд ва ҳоло мехоҳанд, ки “ҳақ ба ҳақдор бирасад”.
Ҳамчунин онҳо зикр кардаанд, ки ҳадафи онҳо суботи комил дар Тоҷикистон аст ва онҳое, ки аз берун ба сӯи кишвар санг меандозанд, бояд аз тарафи мақомоти Иттиҳоди Аврупо боздошт ва ба Тоҷикистон истирдод шаванд.
Гуфта мешавад, шояд ин ҷо истирдоди раҳбари ҳизби ҳоло мамнӯи наҳзати исломӣ Муҳиддин Кабирӣ дар назар аст, ки тобистони соли гузашта кишварро тарк кард ва баъди он низ теъдоде аз аъзои ҳизб аз Тоҷикистон рафтанд ва гуфта мешавад, дар кишварҳои аврупоӣ зиндагӣ мекунанд.
Ғайр аз ин, теъдоди дигаре аз мухолифони давлат, ки худро аъзои “Гурӯҳи 24”, як созмони мамнуъ дар Тоҷикистон меноманд, дар кишварҳои аврупоӣ, аз ҷумла Олмон зиндагӣ мекунанд ва мақомоти расмӣ дар гузашта истирдоди онҳо ба Душанберо талаб кардаанд.
