Нурулло Алиев, размикори шинохтаи тоҷик бо ташкилоти бонуфузи муҳорибаҳои омехта – UFC қарордоди нав ба имзо расонидааст, хабар медиҳад худи варзишгар.
“Бо UFC дуюм бор қарордод бастам. Ба дастаи худ ва касоне, ки маро дастгирӣ мекунанд, изҳори миннатдорӣ мекунам. Мо ба пешравӣ идома медиҳем”, – зикр кардааст ӯ.
Нурулло Алиев яке аз намояндагони барҷастаи насли нави размикорони муҳорибаҳои оемхта ё ММА маҳсуб меёбад. Ӯ зодаи Душанбе буда, пайраҳаи худро дар варзиш аз куштии тарзи озод оғоз намуда, чанд сол қаҳрамони кишвар ва ҷоизадори мусобиқоти қораи Осиё шуд.
Баъдан ӯ дар панкратион муваффақона ҳунарнамоӣ карда, ба дарёфти медалҳои тиллои мусобиқоти қаҳрамонии ҷаҳон ва Осиё даст ёфт. Сипас ба муҳорибаҳои омехта гузашт. Аллакай дар солҳои аввали ҳунарнамоии касбӣ Алиев сатҳи баланд нишон дода, ба пирӯзиҳо ноил гардид.
Акс аз UFC
Соли 2022 барои Алиев калидӣ дониста мешавад. Дар ин сол ӯ дар рақобат дар силсилаи довталабони Дана Уайт ғолиб шуда, бо UFC қарордод баст. Аз он замон Алиев дар лига якчанд рақобат гузаронида, дар ҳамаашон дастболо шуд. Миёни онҳо метавон аз рақобатҳо бо Рафаэл Алвес, Ҷо Солеки ва Шакум Рок ёд овард.
Тамдиди муҳлати созишнома бо UFC ин на танҳо як расмиёт аст. Маъмулан бо размикороне, ки арзиши худро барои ташкилот собит месозанд, маротибаи дуюм қарордод ба имзо мерасонанд. Шартҳои беҳтаршуда чунин маъно доранд, ки Алиев ба сафи дороиҳои ояндадори лига шомил буда, метавонад ба рақобатҳои бештар ҷиддӣ дар оянда умедвор бошад.
“Уқоби тоҷик” имрӯз дар ИМА ва Тоҷикистон бо машқу тамринҳо машғул буда, аз дастаҳои “Aliev Team” ва “Kill Cliff FC” намояндагӣ мекунад. Тарзи рақобати ӯ ба тавозуни куштӣ ва техникаи зарбазанӣ асос ёфта, дар вазни сабук ва миёнавазн ӯро размикори универсалӣ мегардонад.
Акнун бо имзои қарордоди нав барои Алиев марҳилаи нави касбӣ – даст ёфтан ба сафи 15-гонаи беҳтарин дивизион боз мешавад.
