Душанбе. 13-уми ноябр. ОИ «Азия-Плюс» – Нимаи дуввуми имрӯз нахуствазири мамлакат – Оқил Оқилов ҷиҳати ширкат дар ҷаласаи навбатии Шӯрои раҳбарони ҳукуматҳои кишварҳои узви Иттиҳоди Давлатҳои Мустақил ба шаҳри Кишинёв – пойтахти Ҷумҳурии Молдова сафар кард.
Тавре ёвари нахуствазир Фирӯз Ҳикматов ба ОИ «Азия-Плюс» хабар дод, дар нишаст баррасии наздики 35 лоиҳаи аснод дар назар аст. Дар меҳвари мулоқот масъалаи Стратегияи рушди иқтисодии ИДМ барои давраи то соли 2020 қарор хоҳад дошт, ки он дар нишасти сарони кишварҳои ИДМ моҳи октябри соли 2008 умуман маъқул шуморида шуда, барои қабули қарори ниҳоӣ бо дарназардошти пешниҳод ва тағйиру илова ба ҳукумати кишварҳо ирсол гардида буд. Маврид ба ёдоварист, ки масъалаи мазкур дар ҳамоиши сарони кишварҳои узви Иттиҳод, дар моҳи октябри соли ҷорӣ баррасӣ шуда буд. Он вақт ин санад аз тарафи сарони кишварҳои аъзо мавриди таъйид шуд ва барои баррасӣ ва қабули қарори ниҳоӣ дар бораи он ба раҳбарони ҳукуматҳо пешниҳод гардид.
Ба иттилои манбаъ, дар қатори асноди дигар инчунин ҷиҳати баррасӣ масъалаи муайян кардани самтҳои афзалиятноки ҳамкории кишварҳо дар бахши нақлиёт то соли 2020 низ пешниҳод хоҳад шуд.
Мувофиқи маълумоти хадамоти матбуоти ИДМ, иттиҳод дар миқёси ҷаҳон аз имконоту захираҳои назаррас бархӯрдор аст. Он 16,4 дарсади қаламрави ҷаҳонро ишғол карда, 4,4 дарсади сокинони сайёра дар қаламрави ин кишварҳо ба сар мебаранд. Ба кишварҳои узви иттиҳод 20 дарсади захоири нафт, 40 дарсади захоири газ, 25 дарсади захоири ангишт, 10 дарсади истеҳсоли нерӯи барқ, 25 дарсади захоири ҷангал, 11 дарсади захоири барқароршавандаи об ва 13 дарсади захоири заминҳои обии ҷаҳон рост меоянд.
