Душанбе. 27-уми июл. ОИ «Азия-Плюс» – Чанде қабл вазири меҳнат ва ҳифзи иҷтимоии аҳолии ҶТ Шукурҷон Зуҳуров изҳор дошт, ки ҳудуди 25-30 дарсади муҳоҷирони меҳнатие, ки соли равон ба ватан баргашта буданд, бинобар бӯҳрони молӣ дигар натавонистанд, ки ба ҷойи кори пештараи худ баргарданд.
Ба қавли вазир, дар нимсолаи аввали соли ҷорӣ ҳаҷми интиқоли маблағҳои муҳоҷирони меҳнатӣ ба ватан нисбат ба ҳамин давраи соли гузашта ба андозаи 28-30 дарсад коҳиш ёфта, наздик ба 750 млн. доллари ИМА-ро ташкил додааст. «Чун айни замон ва минбаъд низ рушди кишвари мо ба раванди муҳоҷирати меҳнатӣ бастагии зиёд дорад, дар ин самт дар сатҳҳои гуногун қарордоду созишномаҳои зиёде ба имзо расидаанд, вале аксари
онҳо амал намекунанд», – гуфт ӯ.
Ш.Зуҳуров гуфт, мебояд ба мушкилоти муҳоҷирати меҳнатӣ ҷиддӣ муносибат намуд ва бояд дар ин самт сохтори махсусе таъсис дода шавад, ки пурра ба масоили муҳоҷират сарукор дошта бошад. «Муҳоҷирати меҳнатӣ бояд масъалаи стратегии ҷумҳурии мо бошад», – афзуд ӯ.
