Душанбе. 17-уми июн. «Азия-Плюс» — | Муовини Вазири корҳои хориҷии Ҷумҳурии Тоҷикистон Низомиддин Зоҳидов вакили Парлумони Олмон, ҳамоҳангсоз оид ба масъалаҳои энергетикӣ, спикери иқтисодии фраксияи ҳизби ҳокими Бундестаг (ИМД/ИМИ) доктор Йоахим Пфайфферро ба ҳузур пазируфт.
Тавре ба ОИ «Азия-Плюс» аз Департаменти иттилооти Вазорати корҳои хориҷии ҷумҳурӣ иттилоъ доданд, дар рафти вохӯрӣ масъалаҳои ҳамкориҳои дуҷониба байни Тоҷикистон ва Ҷумҳурии Федеративии Олмон, аҳамияти минтақавӣ доштани лоиҳаҳои энергетикии Тоҷикистон, зарурияти тақвият додани инфрасохтори коммуникатсионии минтақавӣ, масъалаҳои экологӣ, вазъият дар Афғонистон ва дигар масъалаҳои мутақобилан судманд мавриди баррасӣ қарор гирифтанд.
Роҷеъ ба масъалаҳои зикргардида Муовини вазир маълумоти муфассал оид ба лоиҳаҳои энергетикию коммуникатсионӣ ва мавқеи Ҷумҳурии Тоҷикистон доир ба ин лоиҳаҳо ба ҷониби олмонӣ пешниҳод намуд.
