Рӯзи ҷумъаи ҳафтаи равон дар боздоштгоҳи рақами 2-и шаҳри Хуҷанд мурофииаи навбатии панҷуми додгоҳӣ оид ба баррасии парвандаи журналисти ҳафтавори «Нури зиндагӣ» Маҳмадюсуф Исмоилов баргузор мешавад. Журналист дар таърихи 23-юми ноябри соли 2010 аз ҷониби мақомоти ҳифзи ҳуқуқ боздошт гардида буд
.
Адвокати рӯзноманигор Муҳаббат Ҷӯраева, ҳуқуқшиноси Маркази дастгирии ҳуқуқии ВАО ва директори Маркази ҳуқуқии «Адвокати ту» дар робита ба ин қазия изҳор кард, ки то ҳанӯз далелҳои айбдоршавии Исмоилов тасдиқи худро наёфтаанд.
Маҳмадюсуф Исмоилов тибқи чаҳор моддаи Кодекси ҷиноии ҶТ дар тӯҳмат, таҳқир, барангехтани кинаю адовати миллӣ, нажодӣ, маҳалгароӣ ва ё динӣ, ҳамчунин тамаъҷӯйӣ айбдор карда мешавад.
«Мо маводи парвандаро ҷиҳати баргузор намудани ташхиси лингвистӣ ба Пажӯҳишгоҳи шарқшиносии назди Академияи улуми кишвар ирсол кардем ва посухаш ҳам акнун дастрас шуд. Акнун дар додгоҳ муайян карда хоҳад шуд, ки маводи журналист дорои тӯҳмат, таҳқир, барангехтани кинаю адовати миллӣ, нажодӣ, маҳалгароӣ ва ё динӣ, ҳамчунин тамаъҷӯйӣ будаанд ё на», – гуфт ӯ.
Ёдрас мекунем, ки бахшида ба Рӯзи байналмилалии ҳамрайъии журналистон рўзи 8 август дар шаҳри Хуҷанд бо иштироки журналистон, намояндагони созмонҳои журналистӣ ва байналмилалӣ дар мавзўи «Ҳамраъйии журналистон – ба тақдири ҳамкасбонамон бетафовут набошем» «мизи мудаввар» барпо гашт.
Иштироккунандагони ҳамоиш инчунин бо мақсади аз маҳбас озод намудани журналист Маҳмадюсуф Исмоилов ба унвони роҳбарияти давлат муроҷиатнома қабул карданд.
Қаблан Созмони байнулмилалии «Рӯзноманигорони бидуни марз» ва Анҷумани миллии воситаҳои ахбори оммаи мустақили Тоҷикистон низ бобати боадолатона ҳал кардани қазияи Исмоилов ба президенти ҶТ муроҷиат карда буданд.
Дар муроҷиатнома аз ҷумла изҳор гардида буд, ки «бо назардошти вазъи саломатӣ ва ифодаи иродаи нек аз Шумо хоҳиш дорем нисбат ба журналист Маҳмадюсуф Исмоилов чораи пешакии дар маҳбас нигоҳ доштан ба чораи дур нарафтан аз маҳалли зист иваз карда шавад». «Мо аз Шумо дархост менамоем, ки нисбат ба парвандаи Исмоилов тафтишоти иловагӣ гузаронида шавад ва мурофиаи додгоҳӣ дар ҷойи дигар, масалан дар шаҳри Душанбе доир гардад, зеро танҳо ҳамин тариқ беғаразиву холисӣ таъмин карда хоҳад шуд», – зикр гардида буд дар муроҷиатнома.
Муаллифони муроҷиатнома бар ин назаранд, ки чораи ҳабси пешакии Исмоилов хеле вазнин аст, зеро Исмоилов наметавонад ба шоҳидон фишор оварад ё баъзе маводро нобуд созад. «Аз озодӣ маҳрум ва ба ҳабс гирифтани Исмоилов чун амали қасоси шахсӣ ба назар мерасад», – изҳор гардида буд дар муроҷиатнома.
