Дар шаҳраки дипломатии Душанбе, ки он ҷо аллакай сафоратхонаҳои Русия, Олмон ва Афғонистон қарор доранд, оянда бинои сафорати Эрон низ қомат меафрозад.
Маросими хишти аввал гузоштан ба таҳкурии бино рӯзи душанбе, 16-уми апрел доир гардид.
Тавре ба ОИ «Азия-Плюс» аз намояндагии дипломатии Эрон дар Тоҷикистон хабар доданд, бинои чаҳорошёнаи сафорат майдони ҳазор метри мураббаъро фаро хоҳад гирифт. Қитъаи замин аз ҷониби мақомоти шаҳрдории пойтахт ҷудо карда шудааст.
Тибқи лоиҳа, дар рӯ ба рӯи бинои сафорат иншооти меъморие бунёд хоҳад шуд, ки таҷассумгари дӯстии се халқи форсзабон – Тоҷикистон, Афғонистон ва Эрон хоҳад буд.
Бино ба маълумоти сафорат, сохтмон аз ҷониби ширкати эронии «Меҳробод» анҷом дода шуда, аллакай баъди як сол, баҳори соли 2013 ба бинои нав кӯчидани кормандони сафорат ба нақша гирифта шудааст. Айни замон бинои сафорати Эрон дар Тоҷикистон дар маркази пойтахт, дар яке аз иморатҳои қадима бо суроғаи кӯчаи Бохтар, 18 воқеъ аст.
Тибқи маълумоти Вазорати корҳои хориҷии ҷумҳурӣ, муносибатҳои дипломатӣ миёни Тоҷикистону Эрон 9-уми январи соли 1992 роҳандозӣ шуда, худи ҳамон сол Эрон нахустин шуда дар Тоҷикистони соҳибистиқлол намояндагии дипломатии худро боз намуд.
