Бо фармони президенти Тоҷикистон ва раиси ҳукумати кишвар Эмомалӣ Раҳмон дар мақомоти раҳбарии як қатор вазорату идораҳои ҳукумати ҷумҳурӣ тағйироти кадрӣ ба вуқӯъ пайваст.
Бино ба маълумоти хадамоти матбуоти сарвари давлат, бо қарорҳои Ҳукумати кишвар Мушовири калони Президенти Ҷумҳурии Тоҷикистон оид ба сиёсати иқтисодӣ Неъматҷон Буриев Муовини якуми Вазири рушди иқтисод ва савдо, Муовини Вазири адлия Абдуманон Холиқов Муовини якуми Вазири адлия ва Мудири шуъбаи назорати Дастгоҳи иҷроияи Президенти Ҷумҳурии Тоҷикистон Ҳаким Мирсаев Муовини вазири адлия таъин гардиданд.
Каримҷон Азизов Муовини якум ва Шоҳона Одинаева Муовини директори телевизиони Сафина таъин карда шуданд.
Муҳаммад Ғойиб, ки қаблан Директори Шабакаи аввали телевизиони Тоҷикистон буд, Сармуҳаррири рӯзномаи Ҷумҳурият таъин карда шуд.
Ҳамчунин аз ҷониби Президенти Ҷумҳурии Тоҷикистон ба Маҷлиси намояндагони Маҷлиси Олии Ҷумҳурии Тоҷикистон номзадии Раиси Иттифоқҳои касабаи вилояти Суғд Саидбой Зокиров барои интихоб ба вазифаи Муовини раиси Комиссияи марказии интихобот ва раъйпурсии Ҷумҳурии Тоҷикистон ва номзадии Директори Агентии давлатии ҳифзи иҷтимоӣ, шуғли аҳолӣ ва муҳоҷирати Вазорати меҳнат ва ҳифзи иҷтимоии аҳолии Ҷумҳурии Тоҷикистон Нурулло Маҳмадуллоев ба узвияти Комиссияи марказии интихобот ва раъйпурсии Ҷумҳурии Тоҷикистон пешниҳод карда шуд.
Тибқи талаботи моддаи 13-и Қонуни Ҷумҳурии Тоҷикистон «Дар бораи Палатаи ҳисоби Ҷумҳурии Тоҷикистон» ба Маҷлиси намояндагони Маҷлиси Олии Ҷумҳурии Тоҷикистон аз ҷониби Президенти Ҷумҳурии Тоҷикистон доир ба таъин намудани сараудиторҳои Палатаи ҳисоби Ҷумҳурии Тоҷикистон пешниҳод ирсол гардид.
Ба ин вазифаҳо Сардори Раёсати пешгирии коррупсияи Агентии назорати давлатии молиявӣ ва мубориза бо коррупсияи Ҷумҳурии Тоҷикистон Ашуралӣ Мирзоев, Роҳбари Котибот дар назди Кумитаи Маҷлиси намояндагони Маҷлиси Олии Ҷумҳурии Тоҷикистон оид ба иқтисод ва молия Қосим Муминов, Муовини сардори Раёсат-сардори шӯъбаи назорати давлатии молиявии Раёсати Агентии назорати давлатии молиявӣ ва мубориза бо коррупсияи Ҷумҳурии Тоҷикистон дар шаҳри Душанбе Файзалӣ Зарипов, Муовини Сардори Раёсати Агентии назорати давлатии молиявӣ ва мубориза бо коррупсияи Ҷумҳурии Тоҷикистон Маҳмадалӣ Самиев ва Сардори Саридораи молияи Вилояти Мухтори Кӯҳистони Бадахшон Зикрихудо Самадов пешниҳод шуданд.
Сарвари давлат зимни сӯҳбат бо кадрҳои ба вазифаҳои нав таъиншуда онҳоро ба кору хизмати содиқонаю софдилона бо дасту дили пок ва ниятҳои хайрхоҳона ҳидоят намуда, таъкид дошт, ки манфиати давлату миллат ва ватани азиз бояд аз ҳама гуна манфиатҳои дигар боло гузошта шавад.
