Имрӯз президенти Тоҷикистон Эмомалӣ Раҳмон бо фармони худ вазири энергетика ва саноати ҷумҳурӣ Гул Шералиро аз мансаб сабукдӯш кард.
Бино ба иттилои хадамоти матбуоти сарвари давлат, бо фармони дигари сарвари давлат Шавкат Бобоев вазири саноат ва технологияҳои нави ҷумҳурӣ таъин карда шуд. Ш.Бобоев қаблан ба ҳайси мудири шуъбаи саноат ва энергетикаи Дастгоҳи иҷроияи президенти Тоҷикистон ифои вазифа мекард.
Ҳамчунин бо қарори ҳукуати ҶТ, собиқ директори иҷроияи Муассисаи давлатии «Маркази идораи лоиҳаҳои бахши электроэнергетика» Усмоналӣ Сабзов вазири энергетика ва захираҳои оби Тоҷикистон таъин гардид.
Ёдрас мекунем, ки тибқи сохтори нави ҳайати ҳукумат, ки аз ҷониби президент маъқул шуморида шуд, Вазорати энергетика ва саноат ба ду ниҳод – Вазорати саноат ва технологияҳои нав ва Вазорати энергетика ва захираҳои оби Тоҷикистон тақсим карда шуд.
Бо фармони президент ҳамчунин вазири мелиоратсия ва захираҳои оби Тоҷикистон Раҳмат Бобокалонов низ аз вазифа озод шуда, бо амри президент ин вазорат барҳам дода шуд.
