Дар мусобиқаи IV-уми байналмилалии Ҷоми Каспий-2014 дар Боку мунтахаби наврасони футболи Тоҷикистон (U-16) ба даври ниманиҳоӣ роҳ ёфт.
Бино ба иттилои сомонаи расмии Кумитаи миллии олимпии ҷумҳурӣ, ин мусобиқаи анъанавӣ барои чорумин бор дар пойтахти Озарбойҷон бо ширкати 12 дастаи мунтахаб ҷараён дорад. Футболбозони навраси тоҷик, ки дар гурӯҳи «С» бо 4 имтиёз мақоми аввалро касб карданд, дар нимфинал рӯзи 3-юми июн бо мунтахаби Туркия рақобат мекунанд.
Футболбозони навраси Туркия, ки бар дастаҳои Қазоқистон (3-1) ва Узбакистон (2-0) пирӯз шуданд, бо 6 имтиёз дар гурӯҳи «D»ҷойи аввалро гирифтанд. Дар бозии дигари ниманиҳоӣ рӯзи сешанбе мунтахаби Озарбойҷон-1,ғолиби гурӯҳи «А», бо тими Эрон, ғолиби гурӯҳи «В», бозӣ мекунад.
Мунтахаби Тоҷикистон нахустин бозиашро 29-уми май бо дастаи Ҷопон бо ҳисоби 1-1 анҷом дода, дар даври дувуми сабқати гурӯҳи «С» рӯзи 30-юми май бар дастаи Гурҷистон бо ҳисоби 3-1 пирӯз шуд. Бозии дастаи Ҷопон бо тими мунтахаби Гурҷистон мусовӣ – 2 бар 2 анҷом ёфт.
