Рӯзи 10-уми июл президенти Тоҷикистон дар маҷмааи «Кохи Ваҳдат»-и пойтахт бо намояндагони мақомоти ҳифзи ҳуқуқ, сохторҳои қудратӣ ва мақомоти суду прокуратураи кишвар вохӯрӣ мегузаронад. Дар ин бора ба «Азия-Плюс» як манбаъ аз ҳукумати ҷумҳурӣ иттилоъ дод.
Ба иттилои манбаъ, вохӯрии президент бо намояндагони ниҳодҳои интизомӣ ва қудратии Тоҷикистон дар доираи иштироки ӯ дар кори ҷаласаи васеи ҳайати мушовараи Прокуратураи генералии ҷумҳурӣ сурат мегирад.
«Интизорӣ меравад, ки дар суханронии худ сарвари давлат ба масъалаҳои марбут ба таъмини амнияти миллӣ, содир шудани ҷиноятҳо аз ҷониби кормандони ниҳодҳои интизомӣ ва қудратӣ ва дигар масъалахои муҳиму рӯзмарраи ин соҳа таваҷҷуҳ зоҳир хоҳад кард», – иброз дошт сарчашмаи хабар.
Зимнан таъкид гардид, ки ҷаласаи васеи ҳайати мушовараи Прокуратураи генералии Тоҷикистон бори нахуст дар берун аз бинои прокуратура доир мегардад.
