Ҳукуматдорони пойтахт бозори миёни мардум маъмул бо номи «Аҷинабозор»-ро бастанд. Ин бозор субҳ ҳангоми ба пойтахт омадани қатораи наздишаҳрӣ фаъолият мекард.
Аз ин бозор аксаран афроди нисбатан даромадашон камтар ва савдогарони бозорҳои дигари шаҳр харид мекарданд, зеро маҳулоти дар «Аҷинабозор» мавриди фурӯш қарормегирифта аз бозорҳои дигари пойтахт арзонтар буданд. Фурӯшандагони маҳсулоти ин бозор – сокинони ноҳияҳои Ҳисору Шаҳринав ва Турсунзода ба бозор миқдор начандон зиёде сабзавоту мева оварда, кӯшиш мекарданд, ки маҳсулоташонро базудӣ фурӯшанд.
Котиби матбуотии мақомоти шаҳрдории Душанбе Шавкат Саидов ба «Азия-Плюс» дар ин робита изҳор намуд, ки бозори мазкур стихиявӣ ва мутаносибан ғайриқонунӣ амал мекард. «Гузашта аз ин, издиҳоми зиёди мардум дар роҳи оҳани назди бозор барои харидорону фурӯшандагон хатарнок буда, аз ин рӯ, чунин тасмим гирифта шуд», – иброз дошт ӯ.
Акнун фурӯшандагони ноҳияҳои гирду атрофи шаҳри Душанбе маҳсулоти ғизойии худро дар бозорҳои сершумори пойтахт ба фурӯш гузошта метавонанд.
