Мақомоти шаҳрдории Душанбе масофаи чанде аз хатсайрҳои нақлиёти ҷамъиятӣ дар шаҳри Душанберо то маҷмааи савдои «Пойтахт-90» дароз кард.
Котиби матбуотии раиси пойтахт Шавкат Саидов ба «Азия-Плюс» дар ин робита иттилоъ дод, ки минбаъд истгоҳи охирини нақлиёти мусофирбар (маршрутка)-и №2 ва №25, ки аз шаҳраки Гипрозем то Кумитаи ҳолатҳои фавқулодда ва аз маҳаллаи Зарафшон то корхонаи истеҳсоли оби ҷав (пиво) мерафтанд, маҷмааи савдои «Пойтахт-90» мешавад.
«Айни замон низ масъалаи дароз шудани масофаи роҳи боз баъзе хатсайрҳои нақлиёти ҷамъиятӣ то маҷмааи мазкур мавриди омӯзиш қарор дорад», – гуфт ӯ.
Зимнан зикр гардид, ки мақомоти шаҳрдорӣ то ҳол директори маҷмааи савдои «Пойтахт-90»-ро таъин накарда, аз азмони ба истифода додани он раҳбарии маҷмаа бар дӯши маъмурияти мақомоти шаҳрдорӣ вогузор шудааст.
Маҷмааи савдои «Пойтахт-90»
аз се ошёна иборат буда, дар онҳо мағозаҳои таъиноти гуногун, тарабхонаву қахвахонаҳо, нуқтаи мубодилаи асъор ва дигар иншооти зарурӣ фаъолият хоҳанд кард. Баъди мавриди истифода қарор гирифтани иншооти мазкур 900 нафар бо ҷойи корӣ дар он таъмин мешаванд.
