Варзишгарони ҷавони тоҷик дар мусобиқаи қаҳрамонии самбои ҷаҳон байни наврасону навҷавонон, ки аз 8-ум то 12-уми октябр дар Сеули Кореяи Ҷанубӣ баргузор шуд, чаҳор медал (1 нуқра ва 3 биринҷӣ) ба даст оварданд.
Дар ин бора Маҳмуди Абдулло, дабири кулли Федератсияи самбои Тоҷикистон, имрӯз аз Сеул ба Кумитаи миллии олимпии Тоҷикистон хабар дода, гуфтааст, «дар ин мусобиқа гуштигирони ҷавон (писарону духтарон) аз 30 кишвари ҷаҳон ширкат доштанд».
Ба гуфтаи ӯ, мусобиқа дар иншооти варзишии «Seoul Student Gymnasium», ки дар он ҷо сабқати муштзанҳо аз рӯи барномаи Олимпиадаи соли 1988 баргузор шуда буд, доир гардидааст.
Ба иттилои Маҳмуди Абдулло, дар сабқати наврасон Фирдавс Насимов дар вазни то 81 кг бо медали нуқра сарфароз гашта, мМуҳаммадризо Қурбонов (-87 кг) ва Хуршед Маҷидов(+87 кг) бо медалҳои биринҷӣ мукофотонида шуданд. «Дар сабқати навҷавонон Муҳаммадҷон Зоидов дар вазни то 74 кг барои ҷойи севум соҳиби медали биринҷӣ гардид», – афзудааст номбурда.
