Раиси Ҳизби коммунисти Тоҷикистон Шодӣ Шабдолов ва котиби Кумитаи марказии ҳизб Исмоил Талбаков имрӯз дар конфронси пешазинтихоботии бахши ҲКТ дар минтақаи Кӯлоби вилояти Хатлон ширкат варзиданд, ки дар он масъалаи иштироки ҳизб дар интихоботи парлумонии ба санаи 1-уми март таъиншуда баррасӣ шуд.
Исмоил Талбаков ба «Азия-Плюс» дар ин робита иттилоъ дод, ки коммунистони Кӯлоб сурат гирифтани амалҳои ҷудоиандозӣ дар сафҳои ҳизбро дар остонаи интихобот қотеъона маҳкум карданд.
Ба гуфтаи ӯ, онҳо аз раҳбарияти ҲКТ талаб намуданд, ки «амалҳои тафриқаандозии бархе аз коммунистон, бахусус дар минтақаи шимоли ҷумҳурӣ мавриди баррасии ҷиддии сохторҳои дахлдори ҳизб қарор дода шавад».
Талбаков қайд кард, ки 13 тан аз коммунистони минтақаи Кӯлоб вакилони анҷумани 31-уми пешазинтихоботии ҲКТ, ки санаи 27-уми декабр дар Душанбе доир мегардад. интихоб шуданд.
Зимнан зикр гардид, ки Шодӣ Шабдолов ба иштирокчиёни пленум дар бораи вазъи ҳаракати ҷаҳонии коммунистӣ маълумот дод.
Ёдрас мекунем, ки қаблан Исмоил Талбаков дар мусоҳиба ба хабарнигори «Азия-Плюс» изҳор дошта буд, ки мансаби котиби аввали бахши ҲКТ дар вилояти Суғд аз ҷониби нафаре бо номи Абдуҷаббор Аҳмедов
худсарона ишғол шудааст
, ки тайи панҷ-шаш соли ахир ба Ҳизби коммунисти Тоҷикистон (ҲКТ) ҳеҷ муносибате надорад.
