Президенти Тоҷикистон Эмомалӣ Раҳмон бинобар сабаби қатли ҳавонаварди урдунӣ аз ҷониби гурӯҳи ифротиву террористии «Давлати исломӣ» ба Абдуллоҳи II ибни Ҳусайн, Подшоҳи Шоҳигарии Ҳошимии Урдун барқияи тасаллият ирсол намуд.
Бино ба иттилои хадамоти матбуоти сарвари давлат, дар барқияи Эмомалӣ Раҳмон дар ин робита зикр мегардад, ки «фоҷеаи қатли ҳайвонавард Муоз ал-Касосиба аз ҷониби гурӯҳи ифротиву террористии «Давлати исломӣ» моро ба даҳшат андохт».
«Бо изҳори тасаллият ба Шумо нисбати ин талафот таъкид бар он медорем, ки чунин амали нафратангези ғайриисломиву ғайриинсонӣ азму иродаи моро ҷиҳати таҳкими ҳамкории байналмилалӣ дар роҳи решакан намудани ин вабои палид, ки таҳдиде ба амнияту суботи минтақа ва тамоми ҷаҳон гаштааст, беш аз пеш афзун менамояд», – омадааст дар барқияи сарвари давлати Тоҷикистон.
Дар фарҷом президенти Тоҷикистон ба Абдуллоҳи II ибни Ҳусайн, пайвандони шаҳид ва мардуми Урдун таъзияву ҳамдардии самимона изҳор мекунад.
