Рӯзи 8 июни соли 2015 Вазири корҳои хориҷии Ҷумҳурии Тоҷикистон Сироҷидин Аслов Вазири давлатии корҳои хориҷии Ҷумҳурии Халқии Бангладеш Муҳаммад Шаҳриёр Аламро, ки ҷиҳати иштирок дар Конфронси байналмилалии сатҳи баланд роҷеъ ба натиҷаҳои татбиқи даҳсолаи байналмилалии амал «Об барои ҳаёт», 2005-2015 дар Душанбе қарор дорад, ба ҳузур пазируфт.
Бино ба иттилои Вазорати корҳои хориҷии ҶТ, зимни суҳбат ҷонибҳо ҳолати муносибатҳои Тоҷикистону Бангладешро баррасӣ намуда, бар зарурати таҳкими робитаҳои байни вазоратҳои корҳои хориҷии ду кишвар ва тавсеаи ҳамкориҳои иқтисодию тиҷоратӣ, таъсиси корхонаҳои муштараки истеҳсолӣ таъкид намуданд.
Ҳамзамон дар атрофи ҳамкориҳо дар ҳошияи созмонҳои минтақавию байналмилалӣ табодули назар сурат гирифт.
Рӯзи 8 июн вохӯрии Вазири корҳои хориҷии Ҷумҳурии Тоҷикистон Сироҷидин Аслов бо Муовини вазири корҳои хориҷии Ҷумҳурии Корея Ли Тэхо, ки ҳайати ин кишварро дар Конфронси сатҳи баланд оид ба натиҷагирии Даҳсолаи байналмилалии амал “Об барои ҳаёт”, 2005-2015 раҳбарӣ мекунад, баргузор гардид.
Роҳҳои татбиқи тавофуқоти дуҷониба, ки зимни сафари Президенти Ҷумҳурии Тоҷикистон ба Ҷумҳурии Корея моҳи апрели соли ҷорӣ ҳосил шуда буд ва инчунин масъалаҳои ҳамкории ду кишвар дар чорчӯби созмонҳои минтақавию байналмилалӣ, ба хусус СММ, мавриди баррасӣ қарор гирифтанд.
Ҳамин рӯз вохӯриҳои Муовини вазири корҳои хориҷии Ҷумҳурии Тоҷикистон Низомиддин Зоҳидӣ бо роҳбарони ҳайатҳои Словакия ва Олмон – Сафири Фавқулода ва Мухтори Ҷумҳурии Словакия дар Ҷумҳурии Тоҷикистон бо иқоматгоҳ дар Тошканд Павол Иван ва Ваколатдор оид ба ҷаҳонишавӣ, сиёсати энергетикӣ ва иқлимӣ дар Вазорати федералии корҳои хориҷии Ҷумҳурии Федеративии Олмон Эрнст Питер Фишер, ки ҷиҳати иштирок дар Конфронси байналмилалии сатҳи баланд роҷеъ ба натиҷаҳои татбиқи даҳсолаи байналмилалии амал «Об барои ҳаёт», 2005-2015 ба Тоҷикистон ташриф овардаанд, баргузор гардиданд.
Дар рафти вохӯриҳо аҳамияти Конфронси мазкур барои ҳалли масъалаҳои умдаи ҷаҳони имрӯз таъкид гардида, cамтҳои ҳамкориҳо ва дурнамои густариши робитаҳо дар соҳаҳои мухталиф дар сатҳи дуҷониба, инчунин дар чаҳорчӯби Иттиҳоди Аврупоро барраcӣ шудаанд.
