Ҳукумати Тоҷикистон лоиҳаи ворид намудани тағйироту иловаҳо ба қонун «Дар бораи бақайдгирии давлатии асноди ҳолати шаҳрвандӣ» ва ба Кодекси оиларо таҳия ва ҷиҳати баррасӣ ба парлумон ирсол кард.
Тавре ба «Азия-Плюс» як манбаъ аз ҳукумати ҷумҳурӣ дар ин робита иттилоъ дод, мувофиқи ин тағйирот, пеш аз издивоҷ навхонадорон ба мақомоти САҲШ бояд ҳатман маълумотномаи тиббӣ дар бораи вазъи солимиашон ва мутобиқати хунашон барои таваллуди кӯдакони солимро пешниҳод намоянд.
Ба гуфтаи манбаъ, ин тағйироту иловаҳо бо супориши президент, ки 6 марти соли гузашта дар вохӯриаш бо занони ҷумҳурӣ садо дода буд, омода шудаанд.
Он замон Эмомалӣ Раҳмон бори навбатӣ таваҷҷуҳи ҳозиринро ба мушкилоти никоҳ миёни хешовандони наздик ҷалб намуда, ба вазоратҳои тандурустӣ ва ҳифзи иҷтимоии аҳолӣ ва адлия дастур дода буд, ки ба аҳолӣ оқибатҳои чунин издивоҷҳоро шарҳ диҳанд ва бо мақсади пешгирии издивоҷ миёни хешовандони наздик, барои ворид намудани тағйироту иловаҳо ба қонунҳои дахлдор пешниҳодҳо омода созанд.
