Рӯзи 25 январ дар шаҳри Пекин вохӯрии узви Шӯрои давлатӣ, вазири амнияти ҷамъиятии Ҷумҳурии Мардумии Чин Го Шэнкун бо раиси Кумитаи давлатии амнияти миллии Тоҷикистон Саидмумин Ятимов доир гардид.
Хабаргузории чинии Синхуа дар ин робита менависад, зимни мулоқот Го Шэнкун изҳори умедворӣ кардааст, ки мутобиқи самтҳои муайянкардаи роҳбарони ҳарду кишвар ҷонибҳо ба таҳкими ҳамкориҳо дар мубориза бо «се нерӯи бадӣ» (терроризм, ифротгароӣ ва ҷудоихоҳӣ), назорати марзҳо ва омодасозии кормандони мақомоти ҳифзи ҳуқуқ идома медиҳанд.
Го Шэнкун ҳамчунин аз ҷонибҳо даъват кардааст, ки ба таҳдиду чолишҳои гуногун пурсамар аксуламал нишон дода, амнияту суботи ҳарду кишвар ва минтақаро ҳифз намоянд.
Саидмуъмин Ятимов барои кумаки беғаразонаи Чин муддати солҳои тӯлонӣ миннатдорӣ изҳор намуда, зикр кардааст, ки Тоҷикистон пайваста ба густариши ҳамкориҳо дар роҳи мубориза бо «се нерӯи бадӣ» ва дигар самтҳои таъмини ҳуқуқу ҳифзи амният ва ҳамчунин посухи муштарак ба таҳдидҳоу чолишҳои гуногун омода аст.
