Дар марзи Тоҷикистону Қирғизистон рӯзи 27 март аз муноқишаи навбатӣ дар сарҳад миёни сокинони деҳаҳои Чоркӯҳи Тоҷикистон ва Оқсойи Қирғизистон барои қитъаи шағалу қумзор ҷилавгирӣ шуд.
Хадамоти марзбонии Қирғизистон дар ин робита
иттилоъ медиҳад
, ки дар доираи тавофуқоти ҳосилшуда байни раисони деҳаҳои Чоркӯҳ ва Оқсой, сокинони ҳарду деҳа айни замон аз қуму рег ва шағали дарёи Каравшин истифода мекунанд, аммо 27 март миёни шаҳрвандони Тоҷикистону Қирғизистон муноқиша рух дода, тоҷикистониён ба 3-4 қирғизҳо иҷозат надодаанд, ки аз ин ҷо қуму шағал бигиранд.
Баъдан шаҳрвандони аз ин амал норозии ҳарду кишвар гурӯҳҳои иборат аз 30-40 нафар бо шумули кормандони техникиро гирдиҳам овардаанд.
Сипас сардорони дидбонгоҳҳои марзии ҳарду ҷониб ба ҷойи ҳодиса ҳозир шуда, миёни гирдиҳамомадагон корҳои фаҳмондадиҳӣ гузаронидаанд ва аз шиддат гирифтани муноқиша пешгирӣ шудааст.
Гуфта мешавад, масъалаи истифодаи муштарак аз шағалу қуми дарёи Каравшин имрӯз, 28 март дар вохӯрии раисони маъмурияти деҳоти Оқсой (Қирғизистон) ва Чоркӯҳ (Тоҷикистон) ҳаллу фасл мешавад.
Ҳамчунин зикр мегардад, ки айни замон вазъ дар ин қитъаи марзи давлатии Тоҷикистон орому муътадил аст.
