Маъмурияти муваққатии Ҷамъияти саҳҳомии кушодаи (ҶСК) “Тоҷиксодиротбонк бо мақсади ҳимояи манфиатҳои муштариён як силсила чорабиниҳоро роҳандозӣ менамояд.
Бино ба иттилои хадамоти матбуоти бонк, аз ҷумла, шурӯъ аз 9 июни соли ҷорӣ амалиётҳои интиқоли пули миллӣ дар шабакаи филиалҳои бонк роҳандозӣ гардидааст.
Гуфта мешавад, шаҳрвандон метавонанд тавассути филиал ва марказҳои хизматрасонии Тоҷиксодиротбонк ба тамоми шаҳру ноҳияҳои кишвар, ки воҳидҳои сохтории бонк мавҷуданд, интиқоли маблағро бо пули миллӣ – сомонӣ анҷом диҳанд.
Зимнан зикр мегардад, ки ҳамзамон, дар бинои Сарбонк воқеъ дар шаҳри Душанбе, кӯчаи Беҳзод, 47 низомҳои байналмилалии “Золотая Корона”, “Контакт”, “Юнистрим”, Western Union, Interexpress ва Caspian Money Transfer фаъол карда шудаанд ва ин ба мизоҷон имкон медиҳад, ки маблағҳои интиқолии худро аз хориҷи кишвар тавассути ин низомҳо дастрас намоянд.
Ёдрас мекунем, ки
аз 20 майи соли равон
пардохти маблағҳои муштариён дар доираи лоиҳаи музди меҳнат ба дорандагони кортҳои пардохтии ҶСК “Тоҷиксодиротбонк”, ки ахиран мутаваққиф шуда буд, аз нав ба роҳ монда шуд.
Қаблан
иттилоъ дода будем
, ки дуюмин бонки тиҷоратии бузург дар Тоҷикистон – «Тоҷиксодиротбонк» баҳри кумак ба Бонки аврупоии таҷдиду рушд (БАТР) муроҷиат кард, то ки буҳрони имконпазири пардохтпазириро пешгирӣ кунад.
Бонки миллии Тоҷикистон санаи 18 май бо мақсади беҳтар кардани вазъи молиявии ҶСК «Тоҷиксодиротбонк» ва ҳимояи манфиатҳои пасандоздорон ва қарздеҳон, ба муҳлати то се моҳ дар бонки зикршуда
маъмурияти муваққатӣ таъйин намуд.
Сарфи назар аз ба мушкилот дучор шудани яке аз бонкҳои низомсози кишвар – «Тоҷиксодиротбонк» дар хизматгузорӣ ба мизоҷон аз оғози сол, эътимод ба низоми бонкии Тоҷикистон
устувор арзёбӣ мешавад.
