Вакилони палатаи поёнии парлумони ҷумҳурӣ Ҳунарманди халқии Тоҷикистон Миралӣ Достиев ва раиси Ҳизби сотсиалистии Тоҷикистон Абдуҳалим Ғаффоров лоиҳаи тағйироту иловаҳо ба қонун «Дар бораи танзими анъана ва ҷашну маросимҳои миллӣ дар Тоҷикистон»-ро таҳия намудаанд.
Дар тағйироту иловаҳо онҳо пешниҳод кардаанд, ки мавсими тобистон ба аҳолӣ иҷозат дода шавад, ки расму оинҳоро аз соати 6-и субҳ то 23-и шаб баргузор кунанд. Айни замон расму оинҳоро рӯзҳои истироҳат аз соати 8 ва рӯзҳои корӣ аз соати 18 то 23 метавон баргузор кард.
Пешниҳодҳои худро вакилон бо он асоснок кардаанд, ки мавсими тобистон вақте ки рӯзҳо дарозанд, расму оинҳоро метавон дар салқинии ҳаво барвақттар барпо кард, ки дар ин ҳолат ҳам барои меҳмонону ҳам барои соҳибони маърака барои корҳои дигар вақти зиёдтар мемонад.
Мувофиқи қонуни зикршуда, барои баргузор кардани ҳама гуна маърака ва расму оинҳои миллӣ на бештар аз се соат вақт муқаррар шудааст.
Ғайр аз ин, вакилон пешниҳод кардаанд, ки шумори иштирокчиёни маъракаҳое чун «домодталбон» ва «арӯсбинон» аз 15 то ба 20 нафар зиёд карда шавад. Айни замон ин маъракаҳо ихтиёрӣ бо аҳли оила дар ҳузури то 15 нафар гузаронида мешавад.
