Нахустин гурӯҳи зойирини тоҷик иборат аз 187 нафар тариқи ҳавопаймои Boeing 737-800-и ширкати «Сомон Эйр» соати 07:30 дақиқаи рӯзи душанбеи ҳафтаи оянда ба Душанбе бармегарданд.
Котиби матбуотии Кумита оид ба корҳои дин, танзими анъана ва ҷашну маросимҳои миллии Тоҷикистон Афшин Муқим ба «Азия-Плюс» дар ин робита иттилоъ дод, ки шурӯъ аз 11 сентябр то 25 сентябр ҳамарӯза ҷиҳати ба ватан овардани ҳоҷиёни тоҷикистонӣ як парвоз анҷом дода мешавад.
Мувофиқи созишҳои ҳосилшуда миёни Тоҷикистон ва Арабистони Саудӣ, имсол ду ширкати ҳавопаймоии ҳарду давлат – “Сомон Эйр” ва Flynas ба ҳаҷравандагон хизматгузорӣ мекунанд.
Арзиши ҳаҷ барои тоҷикистониён имсол 32 ҳазору 671 сомонӣ (тибқи қурби ҳозира – беш аз 3 ҳазору 630 доллар)-ро ташкил дода, шумори квотаҳо ба Тоҷикистон барои адои маросими ҳаҷ бетағйир – 6,3 ҳазор нафар боқӣ монд.
Ёдрас мекунем, ки соли гузашта дар Тоҷикистон дар бораи ба квотаи ҳаҷ дохил накардани шахсони синни аз 40-сола поин қарор қабул шуда, Кумитаи дин бо ин васила масъалаи навбати хеле зиёди хоҳишмандони адои маросими ҳаҷро ҳаллу фасл карданист.
Муддати чандин сол Арабистони Саудӣ шумори квотаҳои ҳаҷ барои кишварҳои мусалмонӣ, аз ҷумла Тоҷикистонро 20% кам мекунад ва бисёре аз шахсони калонсол аз имкони адои маросими ҳаҷ маҳрум мешаванд.
