Дар Душанбе нимаи аввали рӯзи 11 май иҷлосияи понздаҳуми палатаи болоии парлумони Тоҷикистон даъвати панҷум доир мегардад, ки дар он қонунҳои қаблан аз ҷониби палатаи поёнии парлумон қабулшуда баррасӣ мешаванд.
Тавре ба «Азия-Плюс» як манбаъ аз палатаи болоии парлумон хабар дод, аъзои Маҷлиси миллӣ аз ҷумла тағйирот ба қонун «Дар бораи мақоми ҳуқуқии шаҳрвнадони хориҷӣ дар қаламрави Тоҷикистон»-ро мавриди баррасӣ қарор медиҳанд, ки мутобиқи он муддати 10 рӯзи корӣ шаҳрвандони хориҷӣ метавонанд бидуни қайд дар қаламрави Тоҷикистон ҳузур дошта бошанд. Айни замон ин муҳлат аз 3 рӯз иборат аст.
Дар иҷлосияи палатаи болоии парлумон ҳамчунин пешниҳоди ҳукумати Тоҷикистон дар бораи табдили номи як қатор маҳаллаҳои аҳолинишин дар шаҳрҳои Конибодому Исфара ва ноҳияи Бобоҷон Ғафурови вилояти Суғд низ баррасӣ мешавад.
Нимаи дуюми рӯзи 11 май дар Душанбе иҷлосияи навбатии муштараки ҳарду палатаҳои парлумон баргузор мешавад, ки дар он як қатор амрҳои президенти ҷумҳурӣ тасдиқ мешавад.
Хабарҳои моро дар Telegram пайгирӣ намоед, ба шабакаи мо бо суроғаи https://t.me/asiaplus ҳамроҳ шавед.
