Пас аз нисфирӯзии 3 январ дар Тоҷикистон дастрасӣ ба шабакаҳои иҷтимоии Facebook, Instagram, VK, Одноклассники маҳдуд карда шуд. Баъзе аз хабаррасонҳо ҳам бо мушкил кор мекунанд.
Дар мавриди маҳдуд шудани дастрасӣ ба шабакаҳои иҷтимоӣ пеш аз ҳама дар Facebook иттилоъ паҳн гардид, баъдтар маълум шуд, ки дастрасӣ ба дигар шабакаҳои иҷтимоӣ низ маҳдуд гардидааст. Ҳамчунин, тариқи WhatsАpp низ фиристодани садо мушкил шуд.
Чанде аз ширкатҳои интернетрасон мушкили дастрасӣ ба шабакаҳои иҷтимоӣ ва сомонаҳои хабариро эътироф карданд, аммо таъкид намуданд, ки мушкил бо сабабҳои аз онҳо вобаста набуда пеш омадааст.
То ҳол мо натавонистем, ки дар ин робита шарҳи расмии Хадамоти алоқаро дастрас намоем.
Ёдовар мешавем, ки дар ним соли охир дар Тоҷикистон дастрасӣ ба шабакаҳои иҷтимоӣ ва сомонаҳои хабарӣ пайваста маҳдуд карда мешавад. Аз ҷумла, чанд ҳафтаи охир истифодабарандагони интернет дар Тоҷикистон наметавонанд, ки бе қулфшиканҳо сомонаҳои «Азия-Плюс» ва Радиои Озодиро боз кунанд.
10 декабри соли гузашта сафоратҳои Британия Кабир, Германия, Франсия, ИМА ва Намояндагии Иттиҳоди Аврупо дар Тоҷикистон бо пахши изҳороти расмӣ аз маҳдуд шудани дастрасӣ ба сомонаҳои хабарии «Азия-Плюс» ва Радиои Озодӣ ва шабакаҳои иҷтимоӣ нигаронӣ карда буданд.
“Мо чунин мешуморем, ки ҳар нафар ҳуқуқ дорад андешаи худро озод баён намояд. Ҳар шахс метавонад фикри худро дар майдонҳои ҷамъиятӣ ё интернет озод иброз намояд”,-гуфта мешавад дар изҳорот.
Сафирони хориҷӣ аз ҳукумати Тоҷикистон даъват карданд, ки озодии матбуотро, бо риояи меъёрҳои эътирофнамудаи байналмилалӣ, таъмин намояд.
Дар изҳорот зикр карда мешавад, ки интернети босуръат ва дастрас барои рушди иқтисодии ҳар давлат муҳим аст.
Дар ҳамин ҳол, таҷриба нишон медиҳад, ки вақте дар ягон минтақаи кишвар вазъ номуътадил мегардад, дастрасӣ ба шабакаҳои иҷтимоӣ маҳдуд карда мешавад.
Истифодабарандагони шабакаҳои иҷтимоӣ тахмин менамоянд, ки маҳдуд шудани дастрасӣ ба шабакаҳои иҷтимоӣ, ин навбат ба боздошти бародари Маҳмадбоқир Маҳмадбоқиров – Тоҳир Маҳмадбоқиров дар Хоруғ вобаста аст.
