Дар доираи ҳамкориҳои мутақобилан судманд байни Вазоратҳои корҳои дохилии Тоҷикистон ва Ӯзбекистон ҳайати намояндагони Вазорати корҳои дохилии кишвари ҳамсоя, курсантон ва хонандагони мактаб-литсейҳои Вазорати мазкур бо мақсади шиносоӣ ба шаҳри бостонии Хуҷанд ва дигар мавзеъҳои таърихии вилояти Суғд ташриф оварданд.
Бино ба иттилои маркази матбуоти ВКД Тоҷикистон, ҳайати намояндагони кишвари ҳамсояро дар нуқтаи гузаргоҳи сарҳадии Фотеҳободи ноҳияи Мастчоҳ шахсони расмӣ пешвоз гирифта, сипас, меҳмонон аз шаҳри бостонии Хуҷанд, Қасри Арбоб, Маркази миллии «Оши палав», Боғи Парчам, Боғи устод С.Айнӣ ва дигар ҷойҳои тамошобоби шаҳри Хуҷанд боздид ба амал оварданд.
Қайд мешавад, ки аз 23-юм то 25-уми ноябри соли 2018 бо ташаббуси роҳбарияти Вазорати корҳои дохилии Тоҷикистон як гурӯҳ ҷавонони фаъоли гурӯҳи «Авангард» аз ҳисоби муассисаҳои олии кишвар ва курсантони Академияи Вазорати корҳои дохилӣ ба мақсади шиносоӣ аз мавзеъҳои таърихӣ ба шаҳрҳои Бухорову Самарқанди Ӯзбекситон сафар намуда, бо ҳамсолони худ дӯстию рафоқат барқарор намуданд.
Дар ин замина тасмим гирифта шудааст, ки кормандон, курсантон ва хонандагони мактаб-литсейҳои Вазорати корҳои дохилии Ӯзбекистон аз шаҳри таърихии Истаравшан, Мӯғтеппа ва дигар ҷойҳои бостонии вилояти Суғд боздид намуда, бо ҷавонони гурӯҳи «Авангард» ва курсантони факултети №4-и Академияи ВКД Ҷумҳурии Тоҷикистон дар шаҳри Хуҷанд вохӯрӣ доир намоянд.
Ҳамчунин бозии рафиқонаи футбол байни курсантон ва хонандагони мактаб-литсейҳои Вазорати корҳои дохилии Ӯзбекистон ва курсантони факултети №4-и Академияи ВКД Тоҷикистон дар назар дошта шудааст.
