Дар қарори ҳукумати Тоҷикистон аз 31-уми марти соли ҷорӣ дастур дода мешавад, ки содироти оҳанпора ва пасмондаҳои металҳои сиёҳ ва ранга аз ҷумҳурӣ ба хориҷи кишвар манъ карда шавад.
Дар санад гуфта мешавад, ин тадбирҳо бо мақсади “истифодаи пурсамари оҳанпора ва пасмондаҳои металҳои сиёҳ ва ранга, васеъ кардани миқёси коркарди он дар дохили ҷумҳурӣ” роҳандозӣ мешаванд.
Манъи содироти оҳанпора аз 1-уми марти соли 2020 мавриди амал қарор гирифт, яъне як моҳ пеш то расман қабул шудани қарори дахлдори ҳукумат.
Назорати иҷрои қарори мазкур ба зиммаи Вазорати саноат ва технологияҳои нав, Вазорати молия, Вазорати нақлиёти ҷумҳурӣ ва Хадамоти гумрук вогузор шудааст.
Қобили зикр аст, ки пас аз пошхӯрии Иттиҳоди Шӯравӣ коркарди оҳанпора ва пасмондаҳои дигар металҳо қатъ шуда, он ба миқдори зиёд ба Чин бурда мешуд.
Аввали солҳои 2000-ум соҳибкорони Чин азхудкунии бозори оҳанпора ва металҳоро дар худи Тоҷикистон шурӯъ карданд. Онҳо дар Душанбе ва дигар шаҳрҳо корхонаҳои хурди коркарди оҳанпора таъсис доданд, ки пасмондаҳои металро гудохта, асосан арматураи пастсифат тайёр мекарданд.
Соли 2018 ҳукумати Тоҷикистон ба манъи фаъолияти чунин корхонаҳо оғоз кард. Бо мавриди истифода қарор гирифтани корхонаҳои муосири металлургӣ дар Ҳисор ва Душанбе, корхонаҳои хурди коркарди пасмондаҳои метал нолозим шуданд.
Айни замон тайёр кардани оҳанпора дар Тоҷикистон мувофиқи қонунгузорӣ танзим шуда, оҳанпораи корхонаҳои саноатӣ бар асоси шартнома ба корхонаҳои махсус супурда мешавад, ки аз он арматура ва дигар маснуот тайёр карда мешавад. Мардум низ оҳанпораро ба нуқтаҳои қабул месупоранд.
Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 42 45 фиристед.
Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.
