Президенти Тоҷикистон Эмомалӣ Раҳмон дар иртибот ба эълон кардани рӯзи мотами миллии ёдбуди қурбониёни пандемияи коронавирус дар Қирғизистон ба президенти ин кишвар Сооронбай Жээнбеков барқияи изҳори тасаллият ирсол намуд.
Бино ба иттилои хадамоти матбуоти сарвари давлат, дар барқия ба тамоми мардуми бародари Қирғизистон ҳамдардиву таъзияи амиқ изҳор гардида, ба гирифторони ин бемории сироятӣ шифои ҳарчи зудтар хоста шудааст.
“Мо ҷараёни нигаронкунандаи дар сатҳи ҷаҳонӣ паҳн гардидани вируси сироятии “Ковид-19”-ро бо изтироби амиқ пайгирӣ менамоем, – омадааст дар барқия. – Бовар дорам, ки Қирғизистони дӯст бо сарбаландӣ мушкилоти вобаста ба пандемияро бартараф мекунад ва тадбирҳое, ки аз ҷониби ҳукумати кишвар ҷиҳати гирифтани пеши роҳи он ва ба эътидол овардани вазъи эпидемиологӣ андешида мешаванд, ҳатман натиҷаҳои дилхоҳ ба бор хоҳанд овард”.
Эмомалӣ Раҳмон қайд кардааст, ки Тоҷикистону Қирғизистонро анъанаҳои ҳусни ҳамҷаворӣ, ҳамкории созанда ва дастгирии ҳамдигар, ки решаҳояшон аз умқи таърих маншаъ мегиранд, ба ҳам мепайванданд.
“Бо истифода аз фурсат мехоҳам ба Шумо изҳори итминон намоям, ки ҷониби Қирғизистон метавонад дастгирӣ ва мусоидати имконпазири моро ҳамеша дар мадди назар дошта бошад”, – таъкид мешавад дар фарҷоми барқия.
Имрӯз, 30 июл дар Қирғизистон рӯзи мотами миллии ёдбуди қурбониёни пандемияи коронавирус эълон шудааст. Дар тамоми қаламрави кишвар, бинои намояндагиҳои дипломатӣ ва консулгариҳои кишвар дар хориҷа парчами миллӣ поин оварда мешавад.
Қобили зикр аст, ки аз замони оғози пандемияи коронавирус дар Қирғизистон аз ин беморӣ ва илтиҳоби шуши вобаста ба он беш аз 1 ҳазору 300 нафар фавтиданд.
Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 42 45 фиристед.
Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.
