Ҳукумати Тоҷикистон ҷиҳати пардохти иловапулӣ ба шахсоне, ки ба корҳои дорои хусусияти сайёр ва мавсимӣ машғуланд, дастур дод. Дар ин бора рӯзи 27 август қарори дахлдори ҳукумат қабул шудааст.
Дар санад қайд мешавад, ки ба гирифтани иловапулӣ шахсоне ҳуқуқ доранд, ки дар сохтмон, саноати кӯҳкорӣ, энергетика, бахши алоқа, хоҷагиҳои ҷангал ва об, корҳои геологиву иктишофӣ, топографӣ, геодезӣ ва харитасозӣ, инчунин пажуҳишҳо (экспедитсияҳо)-и илмӣ ба корҳои дорои хусусияти сайёр ва мавсимӣ машғуланд.
“Иловапулӣ ба коргарон барои корҳои сайёр бо мақсади ҷуброни хароҷоти марбут ба тез-тез ҷойивазкунии корхона ё дурии он аз макони зисти онҳо дода мешавад”, – зикр мегардад дар санад.
Гуфта мешавад, агар корманд имкон надошта бошад, ки ҳар рӯз ба макони зисташ баргардад, хароҷоти иҷораи манзил мутобиқи меъёрҳои муқарраркарда дар санадҳои меъёриву ҳуқуқӣ дар бораи ҷуброни хароҷот ҳангоми дар сафари хизматӣ будан пардохта мешавад.
Зикр мегардад, ки иловапулӣ ба корҳои дорои хусусияти сайёр ва мавсимӣ дар ҷойи иҷрои корҳо пардохта мешаванд.
Қобили зикр аст, ки аз 1 сентябри соли ҷорӣ музди меҳнати кормандони буҷет, инчунин нафақа ва стипендияҳо ба андоза 10-15% зиёд карда шуданд.
Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 42 45 фиристед.
Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.
