Давоми 8 моҳи соли 2020 ҳаҷми савдои хориҷии Тоҷикистон зиёда аз 3 млрд долларро ташкил дод, ки дар муқоиса бо ҳамин давраи соли гузашта ба андозаи 8% зиёдтар мебошад, хабар медиҳад Агентии омори назди президенти ҶТ.
Касри муомилоти савдои ҷумҳурӣ (афзалияти воридот нисбат ба содирот) 960 млн долларро ташкил дод.
Афзоиши савдои хориҷӣ аз ҳисоби содироти маҳсулот таъмин шудааст. Ҳаҷми содирот давоми моҳҳои январ-августи соли равон ба зиёда аз 1 млрд доллар баробар шудааст, ки нисбат ба ҳамин давраи соли гузашта қариб 50% бештар мебошад.
Молу маҳсулоти Тоҷикистон имсол дар навбати аввал ба Швейтсария (56,9% аз ҳаҷми умумии содирот), Туркия (12,6%) ва Қазоқистон (9,7%) интиқол дода шуд.
Ба хориҷи кишвар асосан сангу фулузоти қиматбаҳо ва нимқиматбаҳо (афзоиш қариб 5 баробар), маҳсулоти гуногуни саноатӣ, маҳсулоти тайёри хӯрокворӣ ва маҳсулоти растанӣ содирот шуданд.
Ҳаҷми воридот тӯли 8 моҳ зиёда аз 2 млрд долларро ташкил дод, ки дар муқоиса бо ҳамин давраи соли гузашта 5,7% камтар мебошад.
Молу маҳсулот ба Тоҷикистон дар ин давра асосан аз Русия, Қазоқистон ва Чин ворид карда шудааст.
Шарикони асосии тиҷоратии Тоҷикистон дар ин давра Русия (савдои дуҷониба – $648 млн), Швейтсария ($598 млн), Қазоқистон ($575 млн), , Чин ($306 млн), Ӯзбекистон ($217 млн) ва Туркия ($208 млн) дониста шудаанд.
Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 42 45 фиристед.
Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.
