Ваколатдори ҳуқуқи инсон ё омбудсмени Тоҷикистон Умед Бобозода, ҷалби иҷбории донишҷӯён ва хонандагонро барои ширкат дар чорабиниҳои оммавӣ ё ба истилоҳ “маршировка”-ҳо нақзи ҳуқуқи инсон намедонад. Ӯ ин ин нуткаро дар посух ба суоли хабарнингори “Азия плюс” имрӯз, дар нишасти матбуотии ниҳоди зери раҳбарияш зикр кард.
Бобозода дар шарҳи мавзӯ қайд кард, ки на танҳо дар Тоҷикистон, балки дар дигар давлатҳо ҳам дар чорабиниҳои муҳими давлатӣ, ба мисли чемпионатҳои ҷаҳонии футбол ҷавонон, донишҷӯён ва хонандагон ба “маршировкаҳо” ҷалб мешаванд.
– Ин барои қонеъ кардани ҳуқуқҳои фарҳангии давлат сурат мегирад. Набояд фаромӯш кунем, ки дар чорабиниҳои муҳими давлать аз давлатҳои дигар меҳмонон меоянд. Дар сурати иштирок накарадани ҷавонон мо наметавонем ин чорабиниҳоро баргузор намоем,-таъкид кард У. Бобозода.
Ӯ дар идома баргузории “маршировка”-ҳоро дар доираи риояи қоидаҳои беҳдоштӣ гуфт ва таъкид кард, ки на ҳамаи донишҷӯён ба ин чорабинӣ ҷалб карда мешаванд, онҳое, ки беморанд ва сабаби дигар доранд, ба маршировка ҷалб намешаванд.
– Айни ҳол таътили тобистонаи донишҷӯён ва хонандагон аст ва дар давоми таътил ҷалб кардани онҳо ба маршировка нақзи ҳуқуқи донишҷӯён нест. Чунки онҳое, ки ба маршировка ҷалб мешаванд, аз имтиёзҳо бархурдоранд ва ба таътили иловагӣ фаро гирифта мешаванд,-хулоса кард Обудсмени тоҷик.
Мавзуъи “маршировка” ё ҷалби иҷбории хонандагону донишҷӯён ба чорабиниҳои ҷашниву оммавӣ яке аз мавзуъҳои доғи Тоҷикистон аст, ки солҳои ахир хеле баҳсҳои густардаро ба бор овардааст.
Ёдрас мекунем, ки ба муносибати ҷашни 30-солагии Истиқлоли давлатӣ дар чанд қисмати шаҳр тамринҳои раҳпаймоии идона мегузаранд.
Сарфи назар аз мавҷи дуюми коронавирус, чорабиниҳои омодагӣ барои ин ҷашн бекор нашуд.
Муовини аввали вазири фарҳанг ва яке аз масъулони ташкил ва баргузории раҳпаймоиҳои идона дар Тоҷикистон Обидҷон Назариён ба “Азия-Плюс” изҳор намуда буд, ки қарор дар бораи бекор кардани “маршировкаҳо” ҳоло қабул нашудааст.
Аввали ҳамин моҳ президенти кишвар Эмомалӣ Раҳмон ба Ситоди ҷумҳуриявии муқовимат бо коронавирус ва Вазорати тандурустӣ дастур дод, ки масъалаи ваксиназанӣ ва риояи қатъии масофаи иҷтимоиро зери назорат гиранд.
Дар Душанбе ҳам онҳоеро, ки ба ин раҳпаймоиҳо ҷалб кардаанд ба таври ҳамагонӣ воксин заданд.
Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 42 45 фиристед.
Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.
