Ширкати ҳавопаймоии “Сомон Эйр” иттилоъ медиҳад, ки бинобар иҷрои корҳои таъмирӣ дар хати парвозии Фурудгоҳи байналмилалии Душанбе ва дар пайи ин баста шудани фурудгоҳ ба ҳангоми корҳои таъмирӣ (аз соати 8:00 то 19:00), ҳамаи парвозҳои ширкат шабона ва субҳгоҳӣ анҷом дода мешаванд.
Дар саҳифаи ширкати ҳавопаймоӣ дар Facebook дар ин робита гуфта мешавад, мусофирони хатсайрҳое, ки вақти парвозашон тағйир пазируфтаанд, пешакӣ огоҳонида мешаванд.
Зимнан зикр мегардад, ки барои гирифтани маълумоти зарурӣ бо маркази маълумотдиҳии ширкати ҳавопаймоӣ бо рақамҳои зерин тамос гирифтан имкон дорад: +992 (93) 777 74 59; +992 (44) 640 40 49 ва +992 (44) 640 40 50; [email protected].
Тавре ба “Азия-Плюс” котиби матбуотии Фурудгоҳи байнулмилалии Душанбе Ҷамила Ҳусейнова хабар дод, корҳои таъмир дар фурудгоҳ аз 1 август то 1 сентябри соли равон идома меёбанд.
Қобили зикр аст, ки пеш аз оғози корҳои таъмир аз Душанбе дар як шабонарӯз беш аз 15-16 ва баъзан зиёда аз 21 парвоз анҷом дода мешуд.
Ёдовар мешавем, ки дар робита ба сар задани мавҷи дуввуми коронавирус дар кишвар, аз 2 июл вуруд ба бинои Фурудгоҳи байналмилалии Душанбе барои пешвозгирандагону гуселкунандагон муваққатан маҳдуд карда шуд. Ин тадбирҳо бо мақсади пешгирии паҳншавии сирояти коронавирус дар байни аҳолӣ андешида шуданд.
Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 42 45 фиристед.
Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.
