Ҳайати Тоҷикистон таҳти роҳбарии раиси Кумитаи ҳолатҳои фавқулодда ва мудофиаи граждании ҷумҳурӣ генерал-полковник Рустам Назарзода дар кори Форуми аврупоии коҳиши хатари офатҳои табиӣ-2021 шаҳри Матозинюши Португалия иштирок мекунад.
Тавре маркази матбуоти Кумита хабар медиҳад, кори Форум имрӯз оғоз гардида, то 26 ноябр идома меёбад.
Гуфта мешавад, Форум ба зарурати ҳалли хусусияти системавӣ, ҷамъшаванда ва мураккаби хатарҳо, бахусус дар партави ҳамагирии Ковид-19 ва ҳолати фавқулоддаи иқлимӣ таъкид хоҳад кард.
Ба иттилои манбаъ, чорабинии мазкур аз ҷониби Раёсати коҳиши хатари офатҳои СММ дар ҳамкорӣ бо Идораи миллии ҳолатҳои фавқулодда ва мудофиаи шаҳрвандии Португалия ва Комиссияи Аврупо ташкил карда шудааст.
“Форум, як механизми муҳими мубориза бо хатари офатҳои табиӣ дар Аврупо, ҳамчун платформа барои ҷонибҳои манфиатдор барои ба дӯш гирифтани масъулияти муштарак ва ӯҳдадориҳои амалӣ ҷиҳати коҳиши хатари офатҳои табиӣ хизмат мекунад”, – омадааст дар хабари Кумита.
Зимнан зикр мегардад, ки ҳамоиш як чорабинии бисёрҷонибаи ҷонибҳои манфиатдор дар рӯҳияи барномаи қолабии Сендай оид ба коҳиш додани хатари офатҳои табиӣ мебошад. Ин имкон медиҳад, ки ҳукуматҳо ва коршиносон дар мавриди таҷрибаҳои андӯхтаи худ ва равишҳои инноватсионии пешгирӣ, коҳиш ва идораи хатарҳои офатҳои табиӣ табодули афкор кунанд.
Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 42 45 фиристед.
Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.
