Дар шаҳри Қазони Тотористон барои кӯдакони тоҷики муқими шаҳр омӯзиши забони модарӣ роҳандозӣ кардаанд. Дарси аввалин 14-уми ноябр роҳандозӣ гардида, интизор меравад чунин дарcҳо пайваста рӯзҳои якшанбе баргузор шаванд.
Дар ин бора АМИТ “Ховар”, бо такя ба Шӯрои ҷамъиятии назди Сафорати Тоҷикистон дар Русия, хабар медиҳад.
Манбаъ навиштааст, ки ба мактаби якшанбегии омӯзиши забони модарӣ фарзандони тоҷикони муқими шаҳри Қазон фаро гирифта мешаванд, ки аксари онҳо дар мактабҳои миёнаи русӣ дар синфҳои ибтидоӣ таҳсил карда, забони тоҷикиро дар сатҳи гуфтугӯ дар доираи суҳбат бо хонавода медонанд.
Гуфта мешавад, ки дар мактаб онҳо доир ба таъриху фарҳанги қадимаи миллати тоҷик, рамзҳои давлатии Тоҷикистон ва дигар муқаддасоти миллӣ маълумоти мухтасар гирифта, инчунин хурдсолон ба омӯзиши алифбои тоҷикӣ машғул мешаванд.
«Ҳадафи аслии таъсиси ин мактаб, пеш аз ҳама, тарғибу ташвиқи омӯзиши забони тоҷикӣ барои фарзандони тоҷикони бурунмарзӣ аст, ки онҳо забони модари худро нигоҳ доранд», – гуфтаанд масъулини Шӯрои ҷамъиятии назди сафорати Тоҷикистон дар Русия.
Бояд гуфт, ки дарсҳои забони тоҷикӣ рӯзҳои якшанбе, соати 16:00 дар бинои «Хонаи дӯстии халқҳо», кӯчаи Павлюхина, №57-и шаҳри Қазон доир мегарданд.
Тоҷикони шаҳри Қазон, ки мехоҳанд фарзандонашон ба омўзиши забони модарӣ ба ин мактаб ҷалб шаванд, метавонанд барои маълумоти муфассал ба ракақмҳои мазкур +79600516297 тамос бигиранд.
