Вазорати амри маъруф ва наҳй аз мункари Толибон* дирӯз, бо нашри баёнияе гуфтааст, ки дар робита ба мамнуъияти навохтани мусиқӣ дар тӯйю маъракаҳо бо Вазорати адлия муштаракан ин тасмимро гирифтаанд.
Дар ин бора рӯзномаи "8 субҳ"-и Афғонистон хабар медиҳад.
Ба иттилои манбаъ, дар эълони ин вазорат омадааст, "дар ҷаласаи баррасии толорҳои арӯсӣ масъулини вазорати адлия аз соҳибони меҳмонхонаҳо хостаанд, ки аз навохтани мусиқӣ ва корҳои хилофи меъёрҳои исломӣ худдорӣ кунанд".
Гуфта мешавад Толибон* ба тӯйхонаҳои арӯсӣ ҳушдор додаанд, ки ин масъаларо пайгирӣ хоҳанд кард ва бо қонуншиканон ҷиддан мубориза хоҳанд бурд.
Толибон пас аз тасаллути дубора бар Афғонистон, қонунҳои сахтгиронаеро болои шаҳрвандони ин кишвар ҷорӣ карданд.
Қаблан низ Вазорати амри маъруфи ин гуруҳ борҳо аз соҳибони меҳмонхонаҳои арӯсӣ ба таври шифоҳӣ хоста буданд, ки дар тӯю маъракаҳо ба пахши мусиқӣ иҷоза надиҳанд.
Дар ҳамин ҳол иддаоҳое вуҷуд доранд, ки ширкаткунандагони шабнишинӣ дар меҳмонхонаҳои арӯсии Кобул ба маъмурони амниятии Толибон* барои навохтани мусиқӣ дар шабнишиниҳои худ боҷ медиҳанд.
Толибон* аз ғасби қудрат дар Афғонистон дар баробари маҳрум кардани занону духтарон аз таҳсил, омӯзиш ва кор, ҳузури онҳоро дар боғҳои тафреҳӣ, тарабхонаҳо ва сафарҳои бидуни маҳрам низ манъ карда, ҳамин тариқ барои кормандони давлатӣ риш ва кулоҳ пӯшиданро иҷборӣ карданд.
*Дар Тоҷикистон гурӯҳи террористӣ эътироф шудааст.
Ҳар он чи дар Афғонистон рух медиҳад, метавонед мустақиман дар сужаи мо – "Афғонистон" бихонед.
