Бо қарори Рустами Эмомалӣ, раиси шаҳри Душанбе то охири моҳи август дар пойтахт ярмаркаи фурӯши либос ва лавозимоти мактабӣ ба роҳ монда мешавад. Дар ин бора аз шаҳрдории Душанбе ба “Азия-Плюс” иттилоъ доданд.
Ба гуфтаи манбаъ, ярмаркаҳои фурӯши либос ва лавозимоти мактабӣ аз 1 то 31-уми август, дар чор ноҳияи шаҳри Душанбе баргузор мегардад.
“Ярмарка бо ҳадафи таъмини хонандагони муассисаҳои таҳсилоти миёнаи умумӣ бо либос ва лавозимоти мактабӣ ва бо риояи қоидаҳои беҳдошт баргузор карда мешавад”, – гуфт манбаъ.
Зикр карда шуд, ки Рустами Эмомалӣ раисони 4 ноҳияи шаҳри Душанберо муваззаф кардааст, то дар ҳамкорӣ бо сохторхои дахлдори шаҳрию ҷумҳуриявӣ иштироки фаъолонаи истеъмолкунандагон ва соҳибкорони ватаниро дар ярмаркаҳо таъмин намоянд.
Макони баргузории ярмаркаҳо:
Дар шаҳри Душанбе: Маркази савдои “Панҷшер”
Дар ноҳияи Исмоили Сомонӣ: ҶДММ МС “Истиқлол”, ҶДММ “Чеварони Лола” ва ҶДММ “Варзоб Т.Ҷ.”
Дар ноҳияи Шоҳмансур: кӯчаи Валаматзода 8 (назди бинои ҳукумати ноҳияи Шоҳмансур), хиёбони Рӯдакӣ 10 (назди Маркази савдои “Садбарг” ва “Шукрона”), кӯчаи Айнӣ 307/5, Маркази савдои “Ховарон” ва Маркази савдои “Гелос”.
Дар ноҳияи Фирдавсӣ: ҶДММ бозори “Корвон” ва “Корвон Плюс”, ҶДММ “Дунёи Нав АСК”, ҶДММ ИИ “Нассоҷии Тоҷик” ва Маркази савдои “Ганҷина”.
Ноҳияи Сино: дохили бозори “Сафариён”.
Гуфтан ба маврид аст, ки масъалаи хариди либосҳои мактабӣ ҳар сол қабл аз оғози соли хониш доғ мешавад, зеро баъзе аз масъулини мактабҳои кишвар волидонро маҷбур мекунанд, барои фарзандонашон аз мағозаҳои муайян либос харанд.
Аммо масъулини Вазорати маориф ва илми Тоҷикистон мегӯянд, хариди либоси мактабӣ аз ҷойҳои мушаххас иҷборӣ нест ва волидону хонандагон ҳақ доранд, ки либоси мактабии худро озодона харанд.
Рӯзи 1-уми август ҳам зимни нишасти матбуотӣ Зиёдулло Абдулзода, муовини вазири маориф ва илми кишвар гуфт, ки “директорони мактабҳои миёнаи кишвар ҳақ надоранд, ки волидони хонандагонро маҷбур созанд, то либоси фарзандашонро аз ҷои хосе харидорӣ кунанд”.
