Дар Тоҷикистон давраи чоруми бақайдгирии довталабон барои таҳсили ғоибона дар донишкадаву донишгоҳҳои Тоҷикистон оғоз шудааст. Дар ин бора аз Маркази миллии тестии Тоҷикистон (ММТ) ба “Азия-Плюс” хабар доданд.
Манбаъ гуфт, давраи чорум дирӯз, 9-уми ноябр, оғоз гардида расо як моҳ, то 9-уми декабри соли равон идома мекунад ва дар он танҳо онҳое ширкат карда метавонанд, ки дар шакли ғоибона таҳсил кардан мехоҳанд.
Барои бақайдгирӣ дар 8 шаҳру ноҳияи интихобшудаи ҷумҳурӣ – Душанбе, Хоруғ, Хуҷанд, Панҷакент, Бохтар, Кӯлоб, Данғара ва Рашт нуқтаҳои бақайдгирӣ ташкил шудааст.
“Агар довталабе, ки дар даври чаҳорум номнависшуда хоҳиши иваз намудани интихобҳои аввалаашро дошта бошад, метавонад дар давоми ҳамин 1 моҳ онро анҷом диҳад. Барои азнавбақайдгирӣ довталаб бояд ба нуқтаи бақайдгирие муроҷиат намояд, ки дар он худро сабти ном намудааст”, – зикр кардаанд аз ММТ.
Аз ин ниҳод гуфтаанд, дар даври чоруми бақайдгирӣ ба довталабон ҷойҳои холимонда дар муассисаҳои олӣ ва миёнаи касбӣ аз рӯйи шаклҳои ғоибонаи таҳсил пешниҳод мешаванд.
Ба иттилои ММТ довталабон дар интихоби ихтисосҳо озод буда, то 12 комбинатсияи ихтисоси ба худ писандро танҳо аз як гурӯҳи ихтисосҳо интихоб намуда метавонанд. Дар вақти бақайдгирӣ яке аз забонҳо (русӣ ва тоҷикӣ) ва макони имтиҳонсупорӣ ва ҷойи фиристодани даъватномаро бояд интихоб намуд.
Бояд гуфт, ки чанд соли охир нақшаи қабули донишҷӯён дар кишвар иҷро намешавад. Аз ҷумла, соли ҷорӣ тибқи иттилои ММТ, дар даври якум нақшаи қабули донишҷӯён ба донишгоҳу донишкадаҳои кишвар 53 дарсад иҷро шудааст.
Баъди ин, ММТ моҳи август давраи дуюми қабули довталабон ва дар моҳи сентябр давраи комилан нави қабули довталабонро ба роҳ монд. Дар даври сеюми имтиҳонҳои ММТ беш аз 8,7 ҳазор довталабон номнавис шуданд.
Роҳбарият ММТ мегӯяд, сабаби иҷро нашудани нақшаи қабул кам гардидани теъдоди хатмкунандагони мактаби миёна ва зиёд муқаррар шудани нақшаи қабул аст.
Коршиносон бар ин назаранд, ки яке аз омилҳои аслии иҷро нашудани нақшаи қабули донишҷӯён, қонун “Дар бораи уҳдадории ҳарбӣ ва хидмати ҳарбӣ” мебошад. Ин қонун магистрантҳо ва докторантҳоро аз ҳуқуқи ба таъхир андохтани хидмати ҳарбӣ маҳрум намуд. Тибқи ин қонун, донишҷӯёне, ки кафедраҳои ҳарбии донишгоҳҳоро хатм мекунанд, низ уҳдадоранд як сол хидмати ҳарбиро адо кунанд.
