Президенти Тоҷикистон Эмомалӣ Раҳмон ба раиси Ҷумҳурии Мардумии Чин Си Ҷинпин дар робита ба ҳалокат ва осеб дидани одамон ва бинову иншооти зиёд бар асари заминларза дар ин кишвар барқияи изҳори тасаллӣ ирсол намуд.
Ба иттилои хадамоти матбуоти сарвари давлат, дар барқия зикр мегардад, ки “хабари ба ҳалокат расидан ва осеб дидани теъдоди зиёди одамон, ҳамзамон зарар дидани бинову иншооти сершумор бар асари заминларзаи шадид дар музофотҳои Гансу ва Тсинхаи Ҷумҳурии Мардумии Чин боиси андӯҳи амиқи ҷониби Тоҷикистон гардид.
“Дар иртибот ба ин мусибати гарон ба Шумо ва наздикону пайвандони фавтидагон ҳамдардӣ ва таслияти самимии инҷонибро иброз менамоям. Ба ҳамаи осебдидагон шифои комил мехоҳам”, – омадааст дар барқияи сарвари давлати Тоҷикистон.
Ёдрас мекунем, ки бар асари заминларзаи рӯзи 18 декабр дар қисмати шимолу ғарби Чин теъдоди зиёди аҳолӣ ба ҳалокат расида, садҳо нафар ҷароҳат бардоштанд. Ҳамчунин шумори зиёди бинову иншоот тахриб шуд.
Тибқи маълумоти ахири хабаргузории Синхуа, теъдоди ҳалокшудагон дар натиҷаи ин заминларза ба 126 нафар расидааст.
Раиси Чин Си Ҷинпин изҳор доштааст, ки “барои баргузории корҳои ҷустуҷӯ ва наҷотдиҳӣ, табобати саривақтии маҷруҳон ва то ҳадди камтарин расонидани теъдоди қурбониён тамоми кӯшишҳо ба харҷ дода шаванд”.
Қобили зикр аст, ки моҳи сентябри соли гузашта бар асари заминларзаи қуввааш 6,6 балл дар музофоти Сичуан дар қисмати ҷанубу ғарби Чин зиёда аз 60 нафар ҳалок шуда буданд.
