Нусхаи охирини филмномаи “Дурахши ахтарон: Ҷомӣ ва Навоӣ” дар Душанбе тасдиқ шуд ва ба зудӣ филмбардорӣ оғоз мегардад. Дар ин бора Файзулло Файзов, коргардони филм ба “Азия-Плюс” иттилоъ дод.
Ӯ гуфт, филм аз ду қисм иборат буда, ҳудуди 4 соат таҳия мешавад.
“Филмнома тасдиқ шуд ва дигар тағйиру иловаҳо ворид намешаванд. Танҳо ҷузъиёти филмбардорӣ, аз ҷумла ҷойҳои филмбардорӣ, сару либос, декаратсия ва ғайра мушаххас гардида истодаанд. Пас аз ин, мо филмбардориро оғоз мекунем”, – гуфт ҳамсӯҳбати мо.
Ба гуфтаи ӯ, ҳоло дар нақши Ҷомиву Навоӣ киҳо ҳунарнамоӣ мекунанд, тасдиқ нашудааст ва мавриди баррасӣ қарор дорад.
“Ҳунарманди нақши Ҷомиро ҷониби Тоҷикистон ва Навоиро ҷониби Ӯзбекистон интихоб мекунанд. Ҳафт нафар дар нақши Ҷомӣ пешниҳод шудаанд, вале касе то ба ҳол тасдиқ нагардидааст”, – афзуд коргардон.
Аммо ӯ аз ҳеқ як ҳунарманди номзад ба нақши асосӣ ном нагирифт.
Интизор меравад, ки то охири тобистон филмбардорӣ оғоз шавад.
Ахиран дар шаҳри Душанбе дар доираи баргузории Рӯзҳои синамои Ӯзбекистон аз ҷониби гурӯҳи эҷодии ҷониби Тоҷикистон филмномаи мазкур мавриди таҳриру таҳлил қарор дода шуд.
Нусхаи ниҳоии филмномаи филми ҳунарии муштараки “Дурахши ахтарон: Ҷомӣ ва Навоӣ” мувофиқа ва тасдиқ гардид. Зери он протокол директори “Тоҷикфилм” Маҳмадсаид Шоҳиён ва муовини директори “Ӯзбекфилм” Шуҳрат Ризоев имзо гузоштанд.
Бояд гуфт, ки тасмими филмбардорӣ дар бораи Ҷомиву Навоӣ соли 2021, зимни сафари президентони ду кишвар ба давлатҳои якдигар рӯи даст гирифта шуд.
Гуфтан ба маврид аст, ки аз Абдураҳмони Ҷомӣ ҳамчун шахси ҳикматшинос ва файласуф ҳам ном бурда мешавад, ки бо панду ҳикматҳои хеш ҳамаро ба худ қарин карда буд ва ҳатто ҳукмронони давр низ мафтуни донишу заковати ӯ гардида буданд.
Яке аз ҷанбаҳои муҳим дар зиндагиномаи Абдураҳмони Ҷомӣ ин муносибати дӯстии ӯ бо Алишер Навоӣ, сардафтари адабиёти классикии адабиёти ӯзбек мебошад. Ҷомию шогирдаш Навоӣ бо ҳамдигар самимона дӯстиву ҳамкорӣ доштанд, ки он далели хуби муносибатҳои чандинасраи адабию фарҳангии байни тоҷикону ӯзбекон мебошад.
Солҳои охир, бо беҳ гаштани муносибатҳои Тоҷикистону Ӯзбекистон, дӯстии Ҷомӣ ва Навоӣ аз мавзӯҳои муҳиме дар суҳбатҳои сиёсатмадорони ду давлат гаштааст.
