Дар семоҳаи аввали соли ҷорӣ Тоҷикистон ба хориҷи кишвар ба маблағи зиёда аз 421 млн доллар фулузот (металл) ва сангҳои қиматбаҳо содир намуд, ки 1250,7 баробар зиёдтар нисбат ба ҳамин давраи соли 2023 мебошад.
Ҳиссаи ин навъи маҳсулот дар ҳаҷми умумиимаҳсулоти содиротии кишвар 48,5%-ро ташкил додааст.
Дар зарфи 3 моҳи соли ҷорӣ Тоҷикистон ба хориҷи кишвар ба маблағи ҳудуди 614 млн доллар молу маҳсулот содир кардааст.
Кишвари асосии фурӯши молу маҳсулоти Тоҷикистон дар ин давра Швейтсария дониста мешавад, ки ба он ҳудуди 48,6%-и содирот рост меояд. Ба гумони ғолиб, ин ба содироти фулузот ва сангҳои қиматбаҳо ба ин кишвар вобастагӣ дорад.
Манбаъҳо дар сохторҳои марбутаи Тоҷикистон зикр мекунанд, ки содироти фулузоти қиматбаҳо, асосан тиллои монетарӣ, вақте зиёд мегардад, ки интиқоли пул аз ҷониби муҳоҷирон ба таври назаррас кам мешавад.
Маълумот дар бораи ҳаҷми интиқоли пул аз ҷониби муҳоҷирон корӣ ба намояндагони васоити ахбори умум дастрас нест.
Тиллои монетарӣ – тилло дар шакли танга, сабика ё пластин мебошад, ки аз омехтаҳо поккорӣ шуда, аз 995 то 1000 дараҷа тозагӣ доранд. Металли сабикашуда бояд ба талаботи меъёри ҷаҳонии «Good Delivery» ҷавобгӯ бошад. Маъмулан дар ихтиёри бонкҳои марказӣ ё/ва вазоратҳои молияи кишварҳои ҷаҳон қарор дорад.
Робита байни фурӯши тилло ва интиқоли маблағ камбуди асъор барои воридоти молу маҳсулот маънидод мешавад.
Гап сари он аст, ки аз ҳисоби даромад аз содирот танҳо ҳудуди сеяки асъори зарурӣ барои воридоти молу маҳсулот рӯйпӯш карда мешавад.
Ҳаҷми умумии воридот дар семоҳаи аввали соли равон ҳудуди 1,5 млрд долларро ташкил додааст, ки қариб 2,5 баробар зиёдтар аз ҳаҷми содироти кишвар мебошад.
