Муовини раиси палатаи қонунгузори порлумони Ӯзбекистон ва раиси Ҳизби эҳёи миллӣ Алишер Қодиров хостааст, ҳукми қатл дар кишвараш бояд дубора ҷорӣ карда шавад.
Ба гуфтаи Қодиров, шахсе, ки ба ваҳшигарӣ даст мезанад, набояд зинда бимонад. "Вақте бо пули андози мо ҷинояткореро, ки ба ҳайвон табдил ёфтааст, нигаҳдорӣ ва сиҳатияшро ҳифз мекунанд, ғайримантиқӣ аст. Ҷомеаро бояд аз ингуна афрод пок кард", – изҳор доштааст ӯ.
Ин пешниҳод дар пасманзари хабарҳо дар бораи он ки як сокини Тошканд писари 3-солаи ҳамзисти худро ба қатл расондааст, садо медиҳад.
Расонаҳои маҳаллии Ӯзбекистон хабар доданд, ки як марди 31-сола аз шаҳри Тошканд писари 3-солаи ҳамзисташро бо 12 зарби корд ба қатл расондааст. Кудак дар роҳ ба бемористон ҷон додааст. Бино ба хабарҳо, ҳам мард ва ҳам модари кудак муътод ба маводи мухаддир будаанд.
Додситонии кулли Ӯзбекистон хабар дода, ки дар робита ба ин ҳодиса парвандаи ҷиноӣ боз ва гумонбар ба ҳабс гирифта шудааст.
