Қисми хароҷоти нақшаи буҷети давлатии Тоҷикистон давоми моҳҳои январ-феврали соли ҷорӣ тибқи маълумоти Вазорати молия ҳамагӣ 55,8% иҷро шуд.
Дар ин давра мувофиқи нақшаи тасҳеҳшуда, маблағгузории буҷетӣ дар умум бояд беш аз 5,7 млрд сомониро ташкил медод. Лекин иҷрои нақша оид ба хароҷоти буҷети давлатӣ ба андозаи ҳамагӣ ҳудуди 3,2 млрд сомонӣ амалӣ шуд.
Аз ҷумла ҳаҷми иҷрои нақшаи маблагғузории буҷетӣ ба соҳаҳои саноат ва сохтмон – 20,8%, фарҳангу варзиш – 35%, бахши ҳокимияти давлатӣ ва идоракунӣ – 35,2%, нақлиёту коммуникатсия – 42,6%, суғуртаи иҷтимоӣ ва ҳифзи иҷтимоӣ – 49,4%, маориф – 55,3%, Хоҷагии манзилию коммуналӣ, экология ва хоҷагии ҷангал – 55,7%, тандурустӣ – 57,6%-ро ташкил дод.
Дар ҳамин ҳол, қисми даромади буҷети давлатӣ давоми моҳҳои январ-фервали соли равон тибқи маълумоти Вазорати молия, 99% иҷро шуд. Ҳаҷми умумии маблағҳои ба буҷет воридшуда қариб 3,5 млрд сомониро ташкил дод.
Наздики 78% аз ҳаҷми умумии даромадҳои буҷетро маблағи пардохтҳо аз андоз (ҳудуди 2,8 млрд сомонӣ) ташкил доданд, ки дар муқоиса бо ҳамин давраи соли гузашта ба андозаи 11,4% ё худ 275 млн сомонӣ зиёдтар аст.
Аз андозҳои асосӣ ҳаҷми пардохти андоз аз арзиши иловашуда (ба миқдори 143 млн сомонӣ), андоз аз даромад ва андоз аз фоида (26,7 млн сомонӣ) ва аксизҳо (23,1 млн сомонӣ) афзуданд.
Дар инфографикаи зер дар бораи даромаду хароҷоти буҷет маълумоти муфассал қобили дарёфт аст.
Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 42 45 фиристед.
Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.
