Раёсати Бонки миллии Тоҷикистон (БМТ) бо қарори навбатии худ меъёри бозтамвили Бонки миллии Тоҷикистонро ба андозаи 1,0 банди фоизӣ баланд кард.
Бино ба иттилои хадамоти матбуоти БМТ, қарори мазкур ҷиҳати таъмини самаранокии сиёсати пулию қарзӣ бинобар зиёд гардидани таъсири фишорҳои таваррумӣ ба иқтисодиёт қабул шудааст.
«Дигаргунии мазкур ҳамчунин бо мақсади паст кардани фоизи миёнаи қарзҳо дар низоми бонкӣ ва муътадил нигоҳ доштани ҳаҷми пул дар муомилот ворид карда шудааст», – омадааст дар маълумоти бонк.
Гуфта мешавад, маротибаи охир меъёри бозтамвили Бонки миллии Тоҷикистон 19 майи соли равон ба андозаи 1,1 банди фоизӣ баланд карда шуда буд.
Қобили зикр аст, ки меъёри бозтамвил воситаи танзими пуливу қарзӣ буда, тавассути он БМТ ба меъёрҳои бозори байнибонкӣ ва меъёрҳои қарзу депозит, ки аз ҷониби ташкилотҳои қарзӣ ба шахсони ҳуқуқиву воқеӣ дода мешаванд, таъсир мерасонад.
