Зимни сафари расмии президенти Белорус Александр Лукашенко ба Тоҷикистон, ки ахири моҳи октябр дар назар аст, баррасии масоили густариши ҳамкориҳои иқтисодӣ миёни ду кишвар ба нақша гирифта шудааст.
Тавре ба ОИ «Азия-Плюс» як манбаъ аз ҳукумати ҷумҳурӣ иттилоъ дод, феълан коршиносони ҳукуматҳои ҳарду ҷониб як силсила аснодеро таҳия кардаанд, ки зимни сафари президенти Белорус ба Тоҷикистон ба имзо хоҳанд расид.
Бо назардошти натоиҷи гуфтушунид дар сатҳи олӣ аз имзои Созишнома дар бораи ҳамкории дарозмӯҳлати Тоҷикистону Белорус барои солҳои 2011-2020, Барномаи ҳамкории иқтисодӣ миёни кишварҳо барои солҳои 2011-2020 ва ҳамчунин як қатор асноди байниҳукуматӣ интизорӣ меравад.
Бино ба маълумоти Агентии омори ҷумҳурӣ, дар зарфи 8 моҳи соли равон ҳаҷми муомилоти молӣ миёни Тоҷикистону Белорус зиёда аз 49,2 млн. доллари ИМА-ро ташкил додаст, ки нисбат ба ҳамин давраи соли гузашта ба андозаи 57,7% бештар аст. Аз Тоҷикистон ба Белорус ба маблағи 9,2 млн. доллари ИМА маҳсулот фиристода шудааст, ки асосан нахи пахта мебошад. Аз Белорус ба Тоҷикистон техникаи нақлиётӣ ва қисмҳои эҳтиётии он ворид мешаванд. Миёни кишварҳои узви Итттиҳоди иқтисодии Авруосиё (ЕврАзЭС) Белорус дар муомилоти моли хориҷӣ бо Тоҷикистон пас аз Русияву Қазоқистон мақоми сеюмро ишғол мекунад.
Дар ҳамин ҳол, имрӯз Александр Лукашенко аз аввалинҳо шуда, президенти Тоҷикистонро бо зодрӯзаш табрик кард. ОИ БЕЛТА менависад, дар барқияи табрикотии худ Александр Лукашенко ба густариши ҳамкориҳои шариконаи дуҷониба ва таҳкими робитаҳои барои ҷонибҳо судманду манфиатовар изҳори умедворӣ кардааст.
