Дар иҷлосияи имрӯзаи Маҷлиси намояндагони Маҷлиси Олии Тоҷикистон дар робита ба изҳороти манфии чанде аз мансабдорони Русия нисбати Тоҷикистон ба унвони Думаи давлатии Русия муроҷиатнома қабул шуд.
Дар муроҷиатнома таъкид мегардад, ки дар тамоми муддати таърихи муносибатҳои сиёсӣ Тоҷикистону Русияро муносибатҳои стратегии шарикӣ ва дӯстии анъанавӣ ба ҳам мепайванданд, вале мутаассифона, ахиран дар ВАО-и Русия пай дар пай изҳороти иғвогарона нисбати Тоҷикистон ба назар мерасанд.
«Бо истифода аз ВАО-и Русия бо изҳороти носаҳеҳ, тӯҳматомез, таҳрифшуда ва хусуматомез шахсони мансабдор, арбобони маъруфи давлатӣ ва ҷамъиятии Русия ибрози назар мекунанд, ки боиси нигаронии ҷиддӣ аст», – зикр мегардад дар муроҷиатнома.
Дар муроҷиатнома гуфта мешавад, суханронии чанде қабли муовини раиси Думаи давлатӣ, пешвои Ҳизби либералӣ-демократии Русия Владимир Жириновский дар барномаи «Поединок»-и телевизони давлатии «Россия» аз ҷумлаи чунин изҳорот аст.
«Суханронии таҳқиромезу дорои хусусияти манфии Жириновский нисбат ба сарвари давлати Тоҷикистон ва мардуми он комилан ба рӯҳияи дӯстӣ ва шарики стратегии кишварҳо созгор нест ва ин шахс намояндаи элитаи сиёсии Русия аст. Кӯшишҳои бо ин васила машҳур гардидани сиёсатмадорон ва арбобони ҷамъиятии Русия метавонад таъсири манфӣ ва оқибатҳои нохуш ба бор оварад», – баён мегардад дар муроҷиатнома.
Вакилони палатаи поёнии парлумони ҷумҳурӣ чунин изҳоротро қотеъона маҳкум намуда, аз Русия боисрор даъват намуданд, ки зимни изҳори назар дар ВАО нисбати Тоҷикистон аз маълумоти саҳеҳу боэътимод кор гиранду мулоҳизаву ҳусни одобро фаромӯш насозанд.
Қобили зикр аст, ки имрӯз зимни ифтитоҳи иҷлосияи навбатии палатаи поёнии парлумони ҷумҳурӣ раиси МНМО ҶТ Шукурҷон Зуҳуров
пешниҳод намуд
, ки масъалаи маъракаи зиддитоҷикии ахиран аз ҷониби ВАО ва сиёсатмадорони ҷудогонаи Русия роҳандозишуда баррасӣ гардад.
