Дар робита ба тағйироти кадрӣ дар ҳайати ҳукумат, се аъзои Маҷлиси миллии Маҷлиси Олии ҶТ то ахири сол ба истеъфо мераванд.
Тавре ба ОИ «Азия-Плюс» аз палатаи болоии парлумони ҷумҳурӣ иттилоъ доданд, мутобиқи қонунгузории кишвар, Қоҳир Расулзода бинобар сабаби ба мансаби нахуствазир таъин шуданаш бояд аз вазифаи муовини аввали раиси Маҷлиси миллӣ, Қодири Қосим бинобар сабаби ба вазифаи раиси Кумитаи давлатии сармоягузорӣ ва идораи амволи давлатӣ таъин шуданаш аз мансаби муовини раиси Маҷлиси миллӣ истеъфо дода, Хайрулло Асоев, ки вазири нақлиёт таъин шуда, низ бояд ваколатҳои аъзои Маҷлиси миллиро биспорад.
Ба иттилои мнабаъ, дар муддати се моҳи баъди қабули қарор дар бораи супурдани ваколатҳои аъзои зикршудаи Маҷлиси миллӣ, Комиссияи марказии интихобот ва раъйпурсии ҷумҳурӣ бояд интихоботи вакилон ба ҷойи аъзои хориҷшударо доир намояд.
Палатаи болоии парлумон аз 33 вакил иборат буда, мувофиқи Конститутсияи ҶТ, аз чор се ҳиссаи аъзои Маҷлиси миллии Маҷлиси Олӣ бо роҳи ғайримустақим тавассути овоздиҳии пӯшида дар ҷамъомадҳои муштараки вакилони мардумии ВМКБ ва шаҳру ноҳияҳои он, вилоятҳо ва шаҳру ноҳияҳои онҳо, шаҳри Душанбе ва ноҳияҳои он, шаҳру ноҳияҳои тобеи ҷумҳурӣ интихоб карда мешаванд.
Дар Маҷлиси миллӣ ВМКБ, вилоятҳо, Душанбе, шаҳру ноҳияҳои тобеи ҷумҳурӣ теъдоди баробари намояндаҳо – ҳар кадоме 5 вакил доранд. Аз чор як ҳиссаи аъзои Маҷлиси миллиро (8 вакил) президенти Тоҷикистон таъин мекунад. Маҷлиси миллӣ дар асоси даъват фаъолият менамояд.
Ҳар як шаҳрванди Ҷумҳурии Тоҷикистон, ки синнаш аз 35 боло буда, маълумоти олӣ дорад, метавонад вакили Маҷлиси миллӣ интихоб ва ё таъин гардад.
Ҳар як президенти собиқи Тоҷикистон то охири умр аъзои Маҷлиси миллӣ маҳсуб мешавад, агар ӯ аз ин ҳуқуқи худ даст накашад.
