Комиссияи ҳукумати Русия оид ба фаъолияти лоиҳаи қонунгузорӣ лоиҳаи қонун «Дар бораи тасдиқи Созишномаи байниҳукуматии Тоҷикистону Русия дар бораи ҳамкорӣ дар бахши таҳвили маҳсулоти нафтӣ»-ро, ки аз ҷониби ВКХ дар ҳамдастӣ бо Вазорати энергетикаи Русия пешниҳод шуд, маъқул шуморид. Дар ин бора дар сомонаи ҳукумати Русия хабар дода мешавад.
Бино ба иттилои манбаъ, ин созишнома як қисмати бастаи аснодест, ки ба он ҳамчунин Созишномаҳо дар бораи тамдиди муддати будубоши пойгоҳи низомии Русия дар Тоҷикистон ва созишномаҳо дар бораи шароити будубоши муҳоҷирони кории Тоҷикистон дар Русия низ дохил мешаванд. Дар маҷмӯъ ин созишномаҳо ба таҳкими робитаҳои ҳамгиройӣ миёни Тоҷикиситону Русия равона шудаанд.
Ҳамин тариқ, бар асоси зербанди «а», банди 1-и модддаи 15-и Қонуни федералӣ «Дар бораи шартномаҳои байнулмилалии Федератсияи Русия», ин созишнома бояд тасдиқ гардад. Лоиҳаи қонун дар ҷаласаи ҳукумат баррасӣ мешавад. Аз нимаи моҳи ноябр ин созишнома то муддати комилан тасдиқ шуданаш, муваққатан мавриди истифода қарор дорад.
Шурӯъ аз 12-уми ноябр ширкатҳои воридкунандаи маҳсулоти нафтӣ ба Тоҷикистон интиқоли сӯзишворӣ аз корхонаҳои коркарди нафти Русияро
бидуни назардошти боҷи содиротӣ
оғоз намуданд, ки ба поинравии нархи маҳсулоти нафтӣ дар бозори дохилии Тоҷикистон мусоидат мекунад. Воридоти ҳаҷми аввали сӯзишвории бидуни боҷи содиротӣ аз Русия аллакай аввали моҳи декабр дар назар буда, бензини навъи АИ-92 аз 6,40 сомонии имрӯза метавонад то 5 сомонӣ барои 1 литр арзон шавад.
Созишномаи мазкурро ҳукумати Тоҷикистон моҳи май тасдиқ намуд, вале аз ҷониби ҳукумати Русия ин санад ҳанӯз ба тасвиб нарасидааст. Мутобиқи тавозуни индикативии маъқулшуда, ҳаҷми воридоти маҳсулоти нафтии Русия бидуни ситонидани боҷи содиротӣ бо назардошти талаботи афзояндаи ҷумҳурӣ дар сатҳи 1 млн. тонна дар як сол пешбинӣ шудааст.
Қаблан аз Вазорати энергетика ва саноати ҷумҳурӣ дар робита ба ин масъала иттилоъ дода буданд, ки тавозуни индикативии сӯзишворӣ, ки дар он
талаботи солонаи Тоҷикистон ба маҳсулоти нафтӣ
дарҷ меёбад, Вазорати энергетикаи Русия дастрас ва ба баррасии он шурӯъ намудааст. Ахири соли 2012 низ Тоҷикистон аз Русия воридоти 1 млн. тонна маҳсулоти нафтиро дархост намуда буд, ки 610 ҳазор тоннаашро бензину сӯзишвории дизелӣ ташкил дода буданд.
