Бонки осиёгии рушд (БОР) Стратегиия нави шарикӣ бо Тоҷикистон барои солҳои 2016-2020-ро таҳия мекунад.
Аз намояндагии доимии БОР дар Тоҷикистон ба «Азия-Плюс» иттилоъ доданд, ки дар доираи таҳияи ин стратегия имрӯз, 28 июл дар Душанбе семинари дуюми машваратӣ гузаронида мешавад.
«Дар кори семинар намояндагони ҳукумат, ҷомеаи шаҳрвандӣ ва шарикон оид рушд ширкат варзида, дар он масъалҳои марбут ба ҳамкории минбаъдаи бонк бо Тоҷикистон мавриди баррасӣ қарор мегиранд», – гуфт манюаъ.
Зимнан зикр гардид, ки ба кори семинари машваратӣ намояндаи доимии БОР дар Тоҷикистон Си. Си. Ю ва вазири рушди иқтисод ва савдои ҶТ Неъматулло Ҳикматуллозода ҳусни оғоз мебахшанд.
Ёдрас мекунем, ки
ахири моҳи майи соли ҷорӣ
зимни мулоқоти муовини аввали вазири рушди иқтисод ва савдои ҶТ Саидраҳмон Назриев бо намояндагони БОР вазъи кунунӣ ва дурнамои ҳамкориҳои дуҷониба баррасӣ шуда буданд.
Қобили зикр аст, ки БОР яке аз ниҳодҳои бузурги молии мадарасон ба Тоҷикистон маҳсуб меёбад, ки давоми 15 сол ба ҷумҳурӣ дар ҳаҷми беш аз 1,3 млрд. доллари ИМА кумаки молӣ расонидааст. Ин воситаҳо ба Тоҷикистон асосан ба сифати бурс ва кумаки техникӣ пешниҳод шудаанд.
Аз соли 2008 Бонки осиёгии рушд танҳо бар асоси бебозгашт ба Тоҷикистон кумаки молӣ мерасонад.
Қаблан раҳбарияти намояндагии БОР дар Тоҷикистон изҳор дошта буд, ки аз соли 2015 имкони барқарор кардани ба Тоҷикистон пешниҳод намудани қарзҳои имтиёзнок вуҷуд дорад. «Эҳтимоли зиёд вуҷуд дорад, ки шурӯъ аз соли 2015 ба Тоҷикистон воситаҳои бурсӣ ва қарзҳои имтиёзнок дар ҳаҷми баробар ҷудо карда шавад», – хабар дода буд ба журналистон намояндаи доимии БОР дар ҶТ С.Си.Ю.
