Нахуствазири Тоҷикистон Қоҳир Расулзода имрӯз, 26 январ сафири Шоҳигарии Муттаҳидаи Британияи Кабир ва Ирландияи Шимолӣ дар Тоҷикистон Хю Стенли Филпоттро ба ҳузур пазируфт.
Тавре як манбаъ аз ҳукумати ҷумҳурӣ дар ин робита иттилоъ дод, зимни мулоқот ҷонибҳо атрофи масоили вазъи кунунӣ ва дурнамои ҳамкориҳои дуҷониба миёни ҳукуматҳои ҳарду кишвар дар бахшҳои иқтисоду савдо, саноату энергетика, нақлиёту сармоягузорӣ ва соҳаи кишоварзӣ табодули назар намуданд.
Ба иттилои манбаъ, дар вохӯрӣ ҳамчунин масъалаҳои ҳамкориҳои мутақобилаи ҷонибҳо дар амалисозии лоиҳаҳои минтақавӣ дар соҳаҳои энергетикаву коммуникатсия ва нақлиёт мавриди баррасӣ қарор гирифтанд.
Зимнан зикр гардид, ки дар ҷараёни мулоқот ба масъалаи дастгирии рушди бахши хусусии иқтисоди Тоҷикистон таваҷҷуҳи хосса зоҳир шуд.
